Indonesia păng Việt Nam kĕ pơm tơlĕch đei lơ gre điê̆n păng Indonesia ‘meh vă jang hơdoi hăm rim Hơnih mơdro sa păng Khul kơdră teh đak Việt Nam vă pơjing đei gre điê̆n tơring ASEAN. ‘Nau nơ̆r pơma tơbăt đơ̆ng ƀok A-dát Ra-sit (Arsjad Rasjid) Kơdră chĕp pơgơ̆r Hơnih bơ̆ jang vei lăng Mơdro sa păng Kmăi kmŏk Indonesia (KADIN), adoi jang hloi Kơdră chĕp pơgơ̆r Khul jang tơgŭm tơdrong mơdro sa ASEAN 2023 (ASEAN-BAC 2023).

Ƀok Arsjad Rasjid akhan, hơnih tĕch răt Đông Nam Á đei rơvơn kơtang răt iŏk gre điê̆n, hăm pơn hơlau tĕch răt iŏk đei ‘noh 2 ti 700 triu dolar lơ̆m sơnăm 2027.  Indonesia pơkăp pơtrŭt kơtang jang hơdoi dôm tơdrong đei rơvơn tih tên găh gre điê̆n, hăm Việt Nam jing hơnih pơm tơlĕch tĕch răt gre điê̆n kơtang dơ̆ng mă pêng tơ̆ Đông Nam Á păng Indonesia jing hơnih pơm tơlĕch tĕch răt lơ găh gre lơ̆m tơring. Hăm trong jang hơdoi păng tơbăt dih băl trong jang gơ̆h adoi nhen khul jang, ƀar teh đak gơ̆h iung jang hơdoi lơ̆m tơdrong pơm tơlĕch tĕch mơdro gre điê̆n lơ̆m tơring ASEAN.