​​Tơ̆ anih jang ming man 02, Tơdrong jang 3, jăl năm klĕch xăh Tân Tiến păng Vụ Bổn (dêh char Đắk Lắk), dôm jĭt tŏ gre lu, gre ben, kơmăy tuh yâu hăk kŭm hăm hlŏh 30 ‘nu công nhân, ki sư găh Công ty jang hơdoi ming man Tân Nam oei hăt bơ̆ jang tôch pran vă tuh yâu hăk ‘măng mă 2 tơ̆ trong. ‘Nhŏng Cao Văn Hoành, công nhân Khul tuh yâu hăk kơ công ty tơroi, 1 puăt sơnăm âu ki ‘nhŏng lăp brŏk ngôi tơ̆ hnam 1 vât đĕch, ‘nhŏng hơnơ̆ng đei măt tơ̆ anih jang pơm trong âu.

‘Nhŏng Cao Văn Hoành ăn tơbăt: “Inh jang tơ̆ âu đei 6 khei bơih, ‘nhŏng oh lơ̆m khul tuh yâu hăk akŏm jơhngâm tuh yâu hăk ăn trong tăl mă mônh păng tăl mă 2. Nhôn lăp pơdơ̆h mưh ‘năr ‘mi kiăl đĕch, oei ‘năr hlăng ‘lơ̆ng ‘nŏh jang hơnơ̆ng hloi.”

Ƀok Phan Xuân Phú, Bơngai vei lăng anih jang ming man 02 (Tơdrong jang 3, Công ty jang hơdoi ming man Tân Nam) tơroi, khul sư iŏk jang tơdrong jang đei kơjă dang 1.200 ti, trong kơjung 15 km, năm klĕch dôm xăh Tân Tiến, Vụ Bổn păng Ea Knếc (dêh char Đắk Lắk). Dang ei tơdrong jang oei hiơ̆ ƀiơ̆ pơting hăm tơdrong hơgăt, kơna công ty krao akŏm hlŏh 120 tŏ gre, kơmăy kơmŏk, kŭm hăm 200 ‘nu công nhân, ki sư bơ̆ jang hơnơ̆ng prăt măng, prăt năr, bơ̆ jang hloi lơ̆m năr pơdơ̆h, năr lêh vă jăh jang đang. Dôm tơdrong jang tơm đei tuh yâu hăl tăl 1, 2, man trong ăn kon pơlei yak vih vât, trong yak sơđơ̆ng; atŭm hăm ‘nŏh công ty oei đei tơdrong tơgŭm, pơlung ăn bơngai jang hai. “’Nhŏng oh công ty bơ̆ jang klĕch năr lêh “3 ka, 4 kip” păng tơdrong tơgŭm, hơpăh jên đei công ty kla trŏ tơdrong hơgăt.”

Tơ̆ tơdrong jang 2 yoa Anih tơm vei lăng min man pơm tơ ‘ngla tơmât jên jang năm klĕch dôm xăh Krông Á, Yang Mao păng Cư Pui, jơhngâm đon bơ̆ jang kŭm oei tŏk tôch pran. ‘Nhŏng Nguyễn Đình Cường, ki sư găh Công ty jang hơdoi Grŭp jang Đạt Phương, anih iŏk jang ming man jăl 03 hăm 3 tŏ kông tơ̆ kông păng 1 pôm trong trôm kơjung 2 km năm klĕch xăh Cư Pui (dêh char Đắk Lắk) tơroi, ‘nâu jĭ tơdrong jang đei tơ̆ tơring teh kơnê̆ păng pơmat tat hlŏh lơ̆m jăl trong. Đĭ đăng anih vă ming man đei lơ̆m bri ‘long hơtăih yăih ngăl, anih đei kong kơjung tôch hơmơt.

Rim năr công ty hơnơ̆ng ăn kơhrĕng ‘nu bơngai jang kŭm hăm lơ gre, kơmăy kơmŏk bơ̆ jang ming man, pơm gơng păng hơmet kơjăp trong trôm: “Dang ei 100 ‘nu bơngai oei pơgơ̆r bơ̆ jang ming man tuh bê tông tơ̆ gơng ƀât Km64 jăl năm klĕch xăh Cư Pui; dang 200 ‘nu bơngai nai ‘nŏh oei klăih song pơm 2 grŭp ming man găh tu, dôm tŏ jrăng, tơnung tơproh tơ̆ gơng. Nhôn adrin bơ̆ jang hloi lơ̆m năr lêh, năr pơdơ̆h vă pơm thoi yơ truh ‘năr 30/6/2026 ‘nŏh pơm đang gơng păng trong trôm.”

Ƀok Phạm Văn Hoà – Phŏ Kơdră Anih vei lăng tơdrong jang ming man anih pơyoa ăn choh jang xa păng trong gre dêh char Khánh Hòa tơroi, dang ei anih tơhlăk găh chưk pơ ‘ngoăih teh tơ̆ Tơdrong jang 1 năm klĕch dêh char Khánh Hoà yoa Anih pơm tơ ‘ngla tơmât jên jang hlôi đei hơmet pơ ‘lơ̆ng. Anih jang oei pơtho ăn dôm anih iŏk jang akŏm jơhngâm hơmet tôm gre, kơmăy kơmŏk kŭm hăm bơngai jang vă bơ̆ jang ming man klăm ăn dôm năr jang kiơ̆ hyĭn mưh đei ‘năr tŏ ‘mi ưh kơ ‘lơ̆ng.

“Pơmat tat tih hlŏh jĭ chưk pơ ‘ngoăih teh ‘nŏh jang đang bơih, mă lei jang lơ̆m pơyan ‘mi ‘nŏh gô tôch pơmat tat, kăl đei trong jang mă lăp. Dôm anih jang iŏk yoa trong găn đak kiơ̆ đơ̆ng chor simong ăn đak ro vă mưh ‘mi prăng ‘nŏh bơ̆ jang hloi. Jơhngâm đon “’mi pă lăng, prăng pă pơdơh” ‘nŏh đei ‘nhŏng oh adrin tôch pơneh vă jang đang trŏ khei ‘năr hơgăt.”

Ƀok Trương Công Thái, Phŏ Kơdră vei lăng kon pơlei dêh char Đắk Lắk, akhan mă đơ̆ng tơdrong jang ming man tơ̆ Tơdrong jang 3 ‘nao jang đei dang 80%, vă akhan hiơ̆ ƀiơ̆ dang 20%, mă lei hăm jơhngâm đon jang tơnăp, adrin tôch pơneh, ưh đei pơdơ̆h năr yơ, khŏm jang vă gơ̆h ăn gre kơdâu tiôch jăl trong ƀât hơtuch sơnăm 2025 ‘nŏh ưh jor gô jang đei.

Ƀok Trương Công Thái ăn tơbăt: “Đắk Lắk oei mât lơ̆m pơyan ‘mi, nhôn pơtho ăn anih iŏk jang ming man, pơgơ̆r tuh yâu hăk lơ̆m năr ưh đei ‘mi; tơdăh ‘mi ‘nŏh tơgĕch kôch hơmet jih trong, pơm răih nang păng hơmet mă ‘lơ̆ng ăn trong yak. Hăm đon pơhnŏng khŏm bơ̆ jang tôch ai, nhôn pơkăp gô ăn gre ƀât hơtuch sơnăm 2025.”

Hăm đon pơhnŏng tôch pơnĕh đơ̆ng tơ ‘ngla tơmât jên jang păng dôm anih iŏk jang, trong gre kơdâu hrĕnh mă blŭng tơƀưh bri kông hăm đak dơsĭ găh Pơbăh kơ Tơring Tŏk bŏk gô đei jang đang đĭ đăng lơ̆m sơnăm 2027, pơih đei tơdrong ‘lơ̆ng ăn tơdrong jang tŏk mŭk drăm, tơpôl, hơdai hăm vei kơjăp tơdrong sơđơ̆ng teh đak lơ̆m chăl ‘nao đơ̆ng rŏng kơ tơmât hơdai.