Ŭnh hnam ƀok Hồ Văn Thiếp, oei tơ̆ pơlei Tru - Chaih, tơring Đông Sơn, apŭng A Lưới, dêh char Thừa Thiên Huế găh ŭnh hnam dơnuh dôm sơnăm kơ au. Ŭnh hnam ưh kơ đei teh jang sa, klo akăn năm jang ăn kơđe vă đei kon jên răt sa. ‘Nao au, Kơđông Ƀô̆ đô̆i vei lăng ‘Măng sơlam teh đak A Đớt tơgŭm djru ŭnh hnam ƀok 1 tŏ rơmo yŏng păng pơtho trong jang sa. Ƀok Hồ Văn Thiếp păng lơ ŭnh hnam tơ̆ au hôn bơnê kơtang tơdrong lăng ba tơgŭm djru đơ̆ng đe mih ma Kơđông Ƀô̆ đô̆i:“Bơnê kơ Hơnih Kơđông ƀô̆ đô̆i vei lăng sơlam teh đak hlôi tơgŭm djru kon pơlei dơnuh yak hloh tơnap tap. Hơpơi ning nai kai ning mônh bơ̆n rong, vei lăng năng tông ‘lơ̆ng, vă ŭnh hnam yak hloh tơnap tap.” 

‘Nao au, Khul kơdră chĕp pơgơ̆r Hơnih Ƀô̆ đô̆i vei lăng sơlam teh đak dêh char Thừa Thiên Huế iung jang hơdoi hăm Khul drŏ kăn dêh char iung jang ming man hnam “Pơbŭng hnam tơnŏ tơring sơlam teh đak” pôk ăn ŭnh hnam dơnuh tơring sơlam teh đak. 4 ŭnh hnam dơnuh oei tơ̆ rim tơring Đông Sơn, Lâm Đớt, A Roàng păng Hương Nguyên kơ apŭng A Lưới đei tơgŭm ăn 1 ŭnh hnam 60 triu hlak jên vă pơm hnam. Kang ƀô̆, ƀô̆ đô̆i kơ rim Kơđông ƀô̆ đô̆i vei lăng sơlam teh đak oei tơ̆ tơring tơgŭm djru năr jang ming man hnam, tĕnh koăng pơm sơđơ̆ng erih sa. Mŏ Huỳnh Thị Bé, oei tơ̆ thôn Chi Lanh - A Roh, tơring Lâm Đớt, apŭng A Lưới pơma akhan, Ƀô̆ đô̆i vei lăng sơlam teh đak hơnơ̆ng tơgŭm djru kon pơlei, nhen ming man hnam, pôk ăn rơmo yŏng, nhŭng yŏng, tơgŭm ăn kon pơlei choh jang sa, xut xa pơngot rơvĕt tơ jur dơnuh, hơmet pơ ‘lơ̆ng erih sa:“Kơđông A Đớt pơjing rơvơn ăn kon pơlei tôch kơ lơ. Đe ‘nhŏng tơgŭm djru kon pơlei tôch kơ lơ nhen chă pơm hnam oei ăn ŭnh hnam dơnuh, tơgŭm rơmo yŏng ăn rim ŭnh hnam dơnuh, pơjing rơvơn ăn kon pơlei yak hloh dơnuh hin. Rim sơnăm, jei đei ŭnh hnam kon pơlei yak hloh dơnuh hin.”

Tơring sơlam teh đak dêh char Thừa Thiên Huế oei đei tôch kơ lơ tơnap tap, tơdrong jang sa hiơ hiơ̆ atŏk tơ iung. Kơ yuơ lơ loh, Ƀô̆ đô̆i vei lăng Sơlam teh đak dêh char Thừa Thiên Huế ling lang yak hơdoi tơgŭm djru kon pơlei xut xa pơngot rơvĕt tơjur dơnuh. Đại úy Võ Xuân Minh, Chính trị viên Kơ iĕng Kơdră Kơđông vei lăng ‘Măng sơlam teh đak A Đơt găh Dơnŏ anih Ƀô̆ đô̆i vei lăng sơlam teh đak dêh char Thừa Thiên Huế tơbăt, hơnih au iŏk vei lăng 3 tơring ‘nŏh tơring Lâm Đớt, Đông Sơn, Hương Phong, apŭng A Lưới hăm hloh 1.890 ŭnh hnam, lơ̆m au, hloh 1.000 ŭnh hnam dơnuh. Hơnih hlôi jang hơdoi hăm Khul kon pơlei choh jang sa, Khul drŏ kăn apŭng, lăng hơlen băt hơdăh tơdrong tơnap tap kơ rim ŭnh hnam, đơ̆ng  noh tơgŭm djru kon pơlei atŏk tơ iung muk drăm:“Hrei au, Kơđông tŏk bŏk vei kơjăp păng iung jang rim tơdrong jang “Ba oh năm tơ̆ hnam trương”, “Kon rong Kơđông Ƀô̆ đô̆i vei lăng sơlam teh đak”, “Bô̆i phe ‘mêm mơnat” ... Hơnih hơnơ̆ng tơgŭm djru 2 ŭnh hnam, lơ̆m 1 khei 1 ŭnh hnam 20 kĭ phe, đơ̆ng nŏh chă pơrô̆ pơrôp, krao hơvơn rim bơngai đei jơhngơ̆m đon ‘lơ̆ng vang chă tơgŭm djru rim tơdrong jang nhen tơ iung pơjing hnam oei ăn bơngai dơnuh tơring sơlam teh đak, sơnăm 2023 ming man 2 tŏ hnam, 1 tŏ hnam kơjă 60 triu hlak jên. ‘Ngoăih kơ ‘nŏh, Kơđông jei tơgŭm djru dơ̆ng găh năr jang vă tơgŭm ăn kon pơlei pơm keh đang hnam tĕnh koăng hloh.”

Khei năr au ki, khul Ƀô̆ đô̆i vei lăng sơlam teh đak hlôi iung jang hơdoi hăm Khul kơdră chĕp pơgơ̆r rim tơring iung jang kiơ̆ lơ tơdrong jang, trong jang tơgŭm djru kon pơlei nhen: “Khul kon pơlei vang vei lăng trong sơlam teh đak, Hơdrơ̆ng sơdrar teh đak"; "Đảng viên Kơđông ƀô̆ đô̆i vei lăng sơlam teh đak iŏk vei lăng năng tông rim ŭnh hnam oei tơ̆ tơring sơlam teh đak”, “Bô̆i phe ‘mêm mơnat”; “Ba oh năm tơ̆ hnam trương”; “Yak hơdoi hăm Đe drŏ kăn tơring sơlam teh đak”... Đơ̆ng nŏh, vang kơrŭn jơhngơ̆m tơ iung pơjing tơring tơrang ‘nao tơklep kơjăp hăm xut xa pơngot rơvĕt tơjur dơnuh kơjăp ‘lơ̆ng tơ̆ tơring. Đại tá Đặng Ngọc Hiệu, Kơ iĕng Kơdră chĕp pơgơ̆r Đảng Ƀô̆ đô̆i vei lăng Sơlam teh đak dêh char Thừa Thiên Huế tơbăt, mĭnh sơnăm Ƀô̆ đô̆i vei lăng Sơlam teh đak dêh char ming man hloh 50 pơbŭng hnam pôk ăn kon pơlei dơnuh tơring sơlam teh đak. Kang ƀô̆ rim Kơđông iung jang bơ̆ jang pơrô̆ pơrôp, pơtho khan păng pơtho tơbăt ăn kon pơlei jang sa tơplih ‘long pơtăm, kon tơrong, hơdrin yak hloh pơngot rơvĕt kơjăp ‘lơ̆ng: “ ‘Nhŏng oh hơnơ̆ng năm ngôi truh hăm rim ŭnh hnam vă chă pơrô̆ pơrôp, pơtho tơbăt ăn kon pơlei găh tơdrong jang sa vă atŏk tơ iung mŭk drăm-tơpôl. Jei kiơ̆ trong bơ̆ jang mă ‘nhŏng oh chă pơrô̆ pơtho tơbăt ‘nŏh lăng ƀôh dôm tơdrong yă kiơ đei, tơdrong jang kiơ kon pơlei gơ̆h jang ‘nŏh vang tơgŭm ăn kon pơlei choh jang sa, mơdro sa, tơdrong tơm ‘nŏh jĭ vă atŏk tơ iung mŭk drăm.”