Tơ̆ Hop akŏm, Jơnŭm vei lăng kon pơlei dêh char Dak Lăk akŏm pơma dơnuh, pơdrơ̆ng kiơ̆ rim tơdrong tơchơ̆t găh klăh asong, hơmet ming trong proh hơmet kon jên jang atŏk tơ iung vă iung jang kiơ̆ rim Tơdrong jang tơm Teh đak; Tơchơ̆t pơjao ƀiên chê̆ kang ƀô̆, măt bơngai bơ̆ jang lơ̆m hơnih bơ̆ jang teh đak sơnăm 2025; tơplih iŏk yoa groi teh bri vă iung jang mĭnh ƀar tơdrong jang tơm; pơm tơlĕch Tơdrong tơchơ̆t bơ̆ jang kơ Jơnŭm vei lăng kon pơlei dêh char, Khul kơdră chĕp pơgơ̆r Jơnŭm vei lăng kon pơlei, rim Hơnih bơ̆ jang, Khul kơdră tang măt păng bơngai tang măt Jơnŭm vei lăng kon pơlei dêh char. Jei tơ̆ ‘Măng hop akŏm, Jơnŭm vei lăng kon pơlei dêh char Dak Lăk jăl X, jăl jang kỳ 2021 – 2026 hlôi pơgơ̆r pôk rơih tơmơ̆t dơ̆ng kơchư̆k kơ iĕng Kơdră chĕp pơgơ̆r Jơnŭm vei lăng kon pơlei dêh char. Hăm pơtôch pôk rơih kơphĭu pôk rơih jơnei  hloh 86,2% bơngai tang măt drơ̆ng nơ̆r, Jơnŭm vei lăng kon pơlei dêh char Dak Lăk hlôi pơjing tơdrong Tơchơ̆t drơ̆ng ƀok Từ Thái Giang đei tŏk jang Kơ iĕng Kơdră chĕp pơgơ̆r Jơnŭm vei lăng kon pơlei dêh char Dak Lăk jăl X, jăl jang 2021 – 2026. Iung pơma tơ̆ hop akŏm, yă Cao Thị Hòa An - Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Jơnŭm vei lăng kon pơlei dêh char pơma hơdăh: lăp đơ̆ng rŏng ƀar khei tơlĕch jang kiơ̆ proh hơmet, hơdrop jing mĭnh dêh char, khul kơdră chĕp pơgơ̆r ƀar kâp hlôi iung jang keh đang, sơđơ̆ng, tơgop ba khul kơdră chĕp pơgơ̆r yak tơjê̆ hăm kon pơlei, xek tơlang tơtom dôm tơdrong đei ƀôh yan ou.