Khul kơdră Đảng, Teh đak hlôi pơm kiơ̆ khôi tơchơ̆t lêh kăp gĭt hloh, vih tơƀlŏk gru kơnăl kăp gĭt kơ jơhnơr hơrih teh đak: Đơ̆ng minh teh đak phŏng kiê̆n ƀơm teh đak đe tơgar, yuk trong đơ̆ng hla kơ Đảng cộng sản Việt Nam, tôm kon pơlei bơ̆n hlôi iung tơjră, tơhuăng chăl ayăt tơgar kơnê̆ tê̆, chăl phŏng kiê̆n, đơ̆ng noh pơtơm tơ-iung pơjing teh đak Việt Nam rơngei hiôk hian, jơnŭm pơgơ̆r kơ kon pơlei, pơm jang kơyuơ kơ kon pơlei.

Atŭm hăm lêh tơbăt noh tơdrong akŏm yak pơrŏ linh hăm tơdrong vang akŏm đơ̆ng jê̆ 16.000 kang ƀô̆, khul linh, khul kŏng ang atŭm hăm tang măt ăn tôm kon pơlei, tôm hơdrung bơngai... Lơ̆m khul gre chơ phao kơnong yak pơrŏ đei tôm khul linh duk, khul linh gre păr, khul phao kơnong, khul linh gre nar... păng lơ kơmăi kơmŏk nai. Khul linh 4 teh đak Nga, Trung Quốc, Lào, păng Campuchia adoi pơtruh khul linh vang akŏm yak pơrŏ linh.  

Lêh tơbăt, yak pơrŏ linh vă sơkơ̆t hơdah anih dơ̆ng kăp gĭt, kơjă kơ jơhnơr hơrih tih tên kơ Kăch mang Khei 8 păng tơdrong iung jing kơ teh đak Việt Nam Dân chủ cộng hòa, dang ei noh teh đak Cộng hòa xã hội chủ nghĩa Việt Nam lơ̆m jơhnơr hơrih iung tơjră vă tơ-iung pơjing păng vei lăng teh đak đơ̆ng kon pơlei hăm tơdrong pơgơ̆r gơh hơgei đơ̆ng Đảng Cộng sản Việt Nam.

Kiơ̆ đơ̆ng 'noh hơmet hơtŏk đon lui đơ̆ng tôm Đảng, tôm kon pơlei hăm sơnong pơgơ̆r  đơ̆ng Đảng Cộng sản Việt Nam; lui ngeh hăm pơkăp tơlĕch jang đơ̆ng  Đảng ah mă tolĕch dôm tơchơ̆t kăp gĭt tih tên vă hơ-'nhăk teh đak mơ̆t jang lơ̆m anglŏ chăl sơnăm 'nao.