Khánh Hòa hơtŏk tơdrong jang gah bơngai kon kông, dôm tơdrong khop
Thứ năm, 14:31, 11/09/2025
Lan chih tơblơ̆
Lan chih tơblơ̆
VOV.Bahnar – Năr (10/9), tơ̆ jơ pơm jang hăm Anih jang vei lăng kon pơlei dêh char Khánh Hòa, Thứ trưởng juăt jang kơ Anih tơm gah Kon kông păng dôm Tơdrong khop Hồ Văn Niên ră hơdah, athei tơtenh hơtŏk vei lăng đơ̆ng teh đak gah tơdrong jang kon kông, dôm tơdrong khop, vei sơđơ̆ng tơdrong jang kiơ̆ pơkăp jơnŭm pơgơ̆r tơring 2 tăl, tơguăt hăm sơnong hơtŏk tơdrong hơrih, tơjur hin dơnuh kơjăp sơđơ̆ng ăn kon pơlei kon kông.
Đơ̆ng rŏng kơ tơmơ̆t hơdai hăm Ninh Thuận, dêh char Khánh Hòa pơtơm đei hloh 2,2 triu kon pơlei. Dêh char đei 36 hơdrung bơngai kon kông hăm 290 rơbou măt bơngai, đei hloh 13% kơsô̆ măt kon pơlei lơ̆m jơ̆p dêh char; đei 12 tơdrong khop hăm jê̆ 900 tơring khop, 650 rơbou bơngai kiơ̆ dôm tơdrong khop păng jê̆ 8.800 bơngai pơgơ̆r dôm tơdrong khop, đe yă giĕng, ƀok soi.
Jăl sơnăm 2021-2025, kơsô̆ unh hnam hin dơnuh lơ̆m tơring tơjur hloh 5% minh sơnăm. Dêh char hlôi keh đang tơdrong tơlĕch jang sut lê̆ hnam pơgia, hnam hyah hyok hrôih 4 khei pơtêng hăm pơkăp jang, hăm 3.500 tŏ hnam đei man 'nao păng ming hơmet.
Viết bình luận