Kiơ̆ tơlĕch jang, tơdrong ming man gô kiơ̆ pơkăp jang BOT đei jên asong đơ̆ng Teh đak vang jang. Jăl trong kơdou hrĕnh Nha Trang- Đà Lạt hơtaih 80km, anih pơtơm pơtoi hăm jăl trong kơdou hrĕnh Tu – Pơbah gah Hlĕch tơ̆ xah Diên Thọ, Khánh Hòa, anih mă hơtuch pơtoi hăm jăl trong kơdou hrĕnh Liên Khương – Prenn tơ̆ phương Xuân Hương, dêh char Lâm Đồng. Jăl trong đei pơkăp kơdou đơ̆ng 80–100km 1 jơ, pơkăp ăn 4 tong gre năm hơdoi, hăm kơsô̆ jên asong ming man pơhlom 25.000 tih hlj.

Khei năr hơmet ming man đơ̆ng sơnăm 2024 truh sơnăm 2025, kơchĕng ming man lơ̆m jăl jang 2026–2028. Tơdrong pơjing jăl trong kơdou hrĕnh Nha Trang – Đà Lạt ưh hơdrô̆ asong ăn tơdrong vih vơ̆t hiôk hian, chơ tơmam drăm roi năr roi tŏk, mă oei pơih ăn minh tơdrong jang hơtŏk tơ-iung 'nao ăn 2 anih jang tơmang pơhiơ̆ tih hloh kơ jơ̆p teh đak, pơm trong hơtŏk tơ-iung kơjăp sơđơ̆ng ăn tôm tơring Pơbah Tŏk bŏk păng Tây Nguyên