Kơ iĕng Thủ tướng Nguyễn Hòa Bình hlôi năm dăr lăng truh 2 tơdrong vă jang “rơbou ti” ‘noh Tơdrong vă jang Hơnih oei kon pơlei Cồn Tân Lập (phương Nha Trang) păng Hơnih kơdrơ̆m ‘nao Mỹ Gia (phương Tây Nha Trang). Tơdrong vă jang Hơnih oei kon pơlei Cồn Tân Lập đei tơdrong glăi lơ̆m pơgơ̆r tơchă bơngai iŏk jang ming man, lơ hơnih ming man hlôi pơdơ̆h jang đơ̆ng đunh. Kon pơlei lơ̆m tơring jei hơpơi ‘meh vă tơdrong vă jang ou hrôih jang keh đang vă pơlei pơla ‘lơ̆ng liĕm. Tơdrong vă jang Tơring kơdrơ̆m ‘nao Mỹ Gia jei tơƀơ̆p tơhlăk tơhlĭn găh tơdrong jang jên hu, tŏk bok đei rim hơnih bơ̆ jang hơnơ̆ng dăr lăng hơlen.

Lơ̆m dêh char Khánh Hòa hlôi tơdrar, athei kơdră kơpal tơchơ̆t kih luơ̆t, iŏk tơvih kon jên tơhoach brăh brư truh 1.100 ti hlak jên. Mă lei, lơ̆m tơdrong xek tơlang hơmet pơ ‘lơ̆ng tŏk bŏk tơƀơ̆p rim tơdrong tơhlăk tơhlĭn kơ yuơ mĭnh ƀar tơdrong vă jang ưh kơ pơgơ̆r chă rơih bơngai tơmơ̆t jên jang. Kơ iĕng Thủ tướng Nguyễn Hòa Bình pơma hơdăh trong bơ̆ jang đơ̆ng Khul kơdră chĕp pơgơ̆r Teh đak ‘noh akŏm hơmet pơ ‘lơ̆ng tơnap tap ăn rim tơdrong vă jang iung jang tim mă keh đang vă veh ver tơdrong pơhoach brăh brư kon jên hu păng pơjing dơ̆ng jơhngơ̆m pran ăn atŏk tơ iung:“Đơ̆ng ƀôh hơdăh tơdrong jang ‘lơ̆ng kơ tơdrong hơmet pơ ‘lơ̆ng tơnap tap kiơ̆ Tơdrong tơchơ̆t 170, tôch lơ tơring, lơ̆m ou đei hloi Khánh Hòa pơđĭ găh Khánh Hòa so păng Ninh Thuận so, bơ̆n oei hơnơ̆ng đei dôm tơdrong vă jang anai jei tôch kơ tơhlăk tơhlĭn, kăl akŏm hơmet pơ ‘lơ̆ng. Tơdăh ưh kơ jăh hơmet pơ ‘lơ̆ng keh đang lei rim mŭk drăm tơpôl pơhoach brăh brư. Mă ƀar ‘noh hiong lơ jơ ‘năr păng tơhlăk tơhlĭn, kon pơlei ‘noh tơtok kơtang”.

         Hơnih jang kmăi kmŏk pơm tơlĕch tơmam drăm păng Ŭnh hơyuh ‘noh 2 lơ̆m kơsô̆ 4 tơdrong jang tơm ăn tŏk mŭk drăm, đei chih tơbăt lơ̆m tơdrong tơchơ̆t 01 kơ Hơnih Đảng dêh char Khánh Hòa. Hrei ou, lơ̆m dêh char hlôi đei 33 hơnih jang kmăi kmŏk pơm tơlĕch tơmam drăm đei pơdrŏ ‘lơ̆ng, akŏp hơgăt teh să 1.400ha. Găh tơdrong jang ŭnh hơyuh, dêh char hlôi pơprŏ đei 60 tơdrong vă jang hăm akŏp pơm tơlĕch đei hloh 8.525 MW ŭnh hơyuh. Ƀok Hồ Xuân Ninh, Kơdră chĕp pơgơ̆r Hơnih vei lăng Mơdro sa dêh char Khánh Hòa tơbăt, hăm tơdrong ‘nao dăr lăng, ‘nao krao hơvơn tơmơ̆t jên jang, dêh char tŏk bŏk pơjing trong iung jang vă hơnih jang kmăi kmŏk pơm tơlĕch tơmam drăm păng ŭnh hơyuh vih hơlơ̆k jing ƀar hơnih jang tơm hloh ăn tŏk mŭk drăm, tơgop hơnhăk mŭk drăm tơring atŏk kơtang lơ̆m chăl ‘nao.“Dêh char Khánh Hòa tŏk bŏk akŏm hơmet pơ ‘lơ̆ng rim tơdrong vă jang tơƀơ̆p tơhlăk tơhlĭn, mă kăl lơ̆m tơdrong vă jang kmăi kmŏk pơm tơlĕch tơmam drăm păng ŭnh hơyuh, nhen lĕ hlôi xek tơlang keh đang. Lăp oei pă mĭnh ƀar tơdrong vă jang, Hơnih vei lăng Mơdro sa dêh char gô hơnơ̆ng pơchoh trong ăn Hơnih vei lăng kon pơlei dêh char hơmet ming, vă pơjing ‘lơ̆ng hơ iă păng hơnhăk dôm tơdrong vă jang ou tơgop kơtang lơ̆m tŏk mŭk drăm. Mưh hơgrop ƀar dêh char Ninh Thuận hăm Khánh Hòa, rim tơdrong vă jang kăl đei dăr lăng hơlen, hơmet pơ ‘lơ̆ng dôm tơdrong tơchơ̆t vă tơlĕch jang kiơ̆ rơvơn hloh”.

Pơma dơnuh dih băl trong hơmet pơ ‘lơ̆ng dôm tơdrong tơhlăk tơhlĭn, ba tơdrong jang kmăi kmŏk pơm tơlĕch tơmam drăm hăm ŭnh hơyuh tơpă jing 2 hơnih jang tơm ăn atŏk tơ iung, Hơnih vei lăng kon pơlei dêh char Khánh Hòa athei rim hơnih bơ̆ jang dăr lăng đĭ đăng rim tơdrong đei ƀơm truh, nhen tơdrong pơm hla bơar, hơnih jang, khul jang, iŏk tơvih teh; adoi sơkơ̆t hơdăh hơnăp jang, tơlĕch jang hơdrol dôm tơdrong jang kăl păng dôm tơdrong vă jang pơjing đei iŏk yua kơjăp. Rim hơnih kăl iung jang kơtang hơmet pơ ‘lơ̆ng trong tơmơ̆t jên jang, tơlĕch ăn trong jang trŏ lăp, adoi chiu pŭ hơnăp jang hơmet pơ ‘lơ̆ng rim tơdrong tơnap tap, tơhlăk tơhlĭn kơ hơnih mơdro sa, bơngai tơmơ̆t jên jang.