Tơbăt ăn khul bơ̆ jang, ƀok Nguyễn Đại Phong,  Kơdră chĕp pơgơ̆r Hnam pơgang tơm Tơring Tây Nguyên tơbăt, lơ̆m jăl jang 2019-2022, Hnam pơgang hlôi iung jang ‘lơ̆ng rim trong jang vă hơnhăk tơdrong bơ̆ jang ‘lơ̆ng hlŏh lơ̆m chă kjhăm, ming hơmet jĭ jăn rim năr roi ‘lơ̆ng hloh dơ̆ng.

Mă kăl ‘nŏh jang kiơ̆ kmăi kmŏk, hơmet pơ ‘lơ̆ng tơdrong bơ̆ jang lơ̆m khăm, ming hơmet jĭ jăn; Tơplih ‘nao trong jang, atŏk jơhngơ̆m đon ‘lơ̆ng, tơgŭm djru rim hnam pơgang tơring; Răt ‘nao kmăi kmŏk kih thuơ̆t gơ̆h hơgei tơgŭm ăn chă khăm păng ming hơmet jĭ jăn. Iung pơma tơ̆ jơ bơ̆ jang, Kơ iĕng Kơdră chĕp pơgơ̆r Hơnih tơm vei lăng Bơ̆ jang Pơgang Trần Văn Thuấn akhan, Hnam pơgang tơm tơring Tây Nguyên kăl đei dơ̆ng trong jang tơgŭm djru, pơjing jơ ‘năr bơ̆ jang gơ̆h hơgei, ‘lơ̆ng hơ iă, tơgoăt mĭnh ƀơ̆r đon păng hơnơ̆ng tơgoăt jang hơdoi hăm rim hnam pơgang kơpal vă pơtho hŏk pơhrăm đơ̆ng hơtăih vă atŏk tơdrong bơ̆ jang gơ̆h hơgei păng gơ̆t jơ̆ng khul ƀok thây pơgang. Găh bơ̆ jang tơchă hơnih tĕch ăn pơgang, tơmam drăm jang pơgang, Kơ iĕng Kơdră chĕp pơgơ̆r tơbăt, dang ei hlôi đei lơ trong bơ̆ jang hơmet pơ ‘lơ̆ng tơnap tap, mă kăl ‘nŏh Hnam pơgang hăm kĕ iung jang dăh mă ưh đĕch.