Tơ̆ hop akŏm, Khŭl drŏ kăn mơdro sa dêh char Đắk Lắk hlôi kĭ pơkăp hla ar chih tơblŏk jang hơdai hăm Khŭl vei lăng drŏ kăn mơdro sa Hàn Quốc anih bơ̆jang tơ̆ găh Tu Gyeonggi. Dôm anih mơdro sa 2 păh kŭm pơgơ̆r kĭ 23 hla ar chih tơblŏk jang hơdai lơ̆m lơ tơdrong jang nhen tơmang lăng, pơvih pơvăn, kơmăy kơmŏk che, tơmam đơ̆ng choh jang sa, tơmam ngă, tơdrong đei yua ăn tơpôl.

Tơdrong kĭ pơkăp chih tơblŏk jang hơdai ‘noh jĭ 1 hơyak năm gĭt kăl pơih ăn lơ tơdrong hiôk ‘nao, tơgŭm đe drŏ kăn mơdro sa hŏk pơhrăm, vang tơroi băl tơdrong hlôh vao păng tơlĕch lơ tơdrong jang hơdai mơdro sa, tơgop pơtrŭt hơtŏk tơiung mŭk drăm tơ pôl. Khŭl drŏ kăn mơdro sa Đắk Lắk bơ̆jang lơ tơdrong jang. ‘Măng âu, Khŭl đei kĭ pơkăp găh mơdro sa pơvih pơvăn, vei lăng bơngai kră, tơmam sa.