Kiơ̆ nơ̆r tơroi tơ̆ jơ bơ̆ jang, đơ̆ng rŏng 5 sơnăm tơ lĕch jang, tơdrong vei lăng tĕh đak găh vei lăng păng atŏk tơiung bri đei tơ lĕch jang hrơ̆ch ‘lơ̆ng, đei yoa. Đơ̆ng sơnăm 2017 truh dang ei, dôm anih jang kơpal chă ƀôh, sơng iŏk, pơm hla ar sek tơlang hlŏh 6.500 tơdrong pơm glăi luơ̆t găh bri ‘long, lơ̆m nŏh sek phak jên hlŏh 6.100 tơdrong. Pơtêng hăm jăl sơnăm đơ̆ng 2012-2016, kơsô̆ tơdrong glăi jur hlŏh 44%. Tơdrong pơtăm ‘long bri iŏk đei lơ tơdrong ‘lơ̆ng, đơ̆ng rŏng 5 sơnăm, lơ̆m dêh char pơtăm đei hlŏh 12.400hec ta, lơ̆m nŏh ‘long pơm tơmam hlŏh 10.100 hec ta oei đei ‘nŏh ‘long tang găn sar bar, ‘long kơdrơ̆ng.

Pơma tơ̆ jơ bơ̆ jang, ƀok Trần Tuấn Anh, Kơdră Anih vei lăng mŭk drăm trung ương athei, Khul kơdră chĕp kơ̆l Anih jang đảng dêh char Dak Lak hơnơ̆ng hơtŏk tơdrong chĕp kơ̆l pơgơ̆r đơ̆ng Đảng hăm tơdrong vei lăng păng atŏk tơiung bri. Lơ̆m nŏh athei tơrĕk hlŏh dơ̆ng truh hơnăp jang đơ̆ng bơngai chĕp kơ̆l lơ̆m dôm tơdrong jang đei ƀơm truh tơdrong pơm glăi luơ̆t vei lăng bri ‘long. Dêh char Dak Lak athei bơ̆ jang mă ‘lơ̆ng tơdrong hơlen năng hăm rim tơdrong jang vei rong ‘long bri brăh, tơplih ming tơdrong iŏk yoa hăm tĕh bri. Găh noh dơ̆ng, dêh char athei đei trong tơdra hơdrol rim tơdrong, tơ̆ hơnăp kơnh athei chih hơdăh rim tơdrong nol păng tơdrong krê lơ̆m tơdrong vei lăng păng atŏk tơiung bri.