Lơ̆m ‘măng iung năm tơmang păng bơ̆ jang tơ̆ Việt Nam kơ Khul kơdră tang măt Kuô̆k hô̆i Cộng hòa Dân chủ Nhân dân Lào, drung kơsơ̆ brei (4/9), tơ̆ pơlei tơm Đà Nẵng, Kơ iĕng Kơdră chĕp pơgơ̆r Kuô̆k hô̆i Việt Nam Nguyễn Đức Hải pơm tơm jơ pơma đam hăm Kơ iĕng Kơdră chĕp pơgơ̆r Kuô̆k hô̆i Cộng hòa Dân chủ Nhân dân Lào Sổm - Mạt Phôn - Xể- Na. Tơ̆ jơ pơma đam, Kơ iĕng Kơdră chĕp pơgơ̆r Kuô̆k hô̆i Cộng hòa Dân chủ Nhân dân Lào sơkơ̆t hơdăh, tơdrong Kuô̆k hô̆i Lào ăn Khul bơ̆ jang năm ngôi păng bơ̆ jang tơ̆ Việt Nam ‘noh tơdrong jang tơlĕch jang kiơ̆ Drơ̆ng mĭnh nơ̆r jang hơdoi ƀar păh Kuô̆k hôi 2 teh đak. Kơ iĕng Kơdră chĕp pơgơ̆r Kuô̆k hô̆i Việt Nam Nguyễn Đức Hải sơkơ̆t hơdăh, sơnăm 2024, Kuô̆k hô̆i Lào iŏk jang Kơdră chĕp pơgơ̆r AIPA, pơgơ̆r Pơm lêh hop akŏm Jơnŭm chĕp pơgơ̆r AIPA-45, Việt Nam drơ̆ng nơ̆r tơgŭm djru Lào bơ̆ jang ‘lơ̆ng hơnăp jang Kơdră chĕp pơgơ̆r ASEAN/AIPA, đơ̆ng noh tơgop pơm hơtŏk hơnăp jang, hơnih dơ̆ng kơ Lào tơ̆ tơring păng lơ̆m apŭng plĕnh teh.