Hơnơ̆ng năm bơ̆ jang tơ̆ teh đak Rim teh đak iĕ jing mĭnh Ả-rập(UAE), lơ̆m rim năr 3-4/5/2023, Kơ iĕng Kơdră chĕp pơgơ̆r teh đak Võ Thị Ánh Xuân hlôi năm ngôi păng bơ̆ jang hăm Hnam trương Pơtho jang tơbôl Anwar Gargash, Grŭp jang Masdar, Grŭp jang Mubadala, năm ngôi Hơnih tang măt Việt Nam păng tơƀơ̆p dôm bơngai tang măt kon pơlei Việt tơ̆ UAE.

Tơ̆ tơƀơ̆p, Kơ iĕng Kơdră Teh đak Võ Thị Ánh Xuân tơroi tơbăt găh pơchoh trong tih lơ̆m bơ̆ jang tơbôl kơ Việt Nam, lơ̆m au sơkơ̆t hơdăh iung jang hơdoi păng atŏk tơ iung, jang kiơ̆ lơ pang, lơ trong tơbôl, jĭ bôl boăl, jĭ jang sa hơdoi păng bôl boăl tơnăp, lăng kơjăp lơ̆m tơpôl apŭng plĕnh teh. Lơ̆m ‘măng năm tơmang rim Grŭp jang Masdar păng Mubadala, ƀar Grŭp jang tơm kơ UAE lơ̆m tơdrong jang ŭnh hơyuh rơgoh ‘lơ̆ng, Kơ iĕng Kơdră chĕp pơgơ̆r Teh đak Võ Thị Ánh Xuân tơroi tơbăt dôm trong tơgŭm djru đơ̆ng Khul kơdră Teh đak Việt Nam lơ̆m hơvơn teh đak đe tơmơt jên jang, mă kăl lơ̆m atŏk tơ iung rơgoh ‘lơ̆ng păng kơjăp ‘lơ̆ng. Kơ iĕng Kơdră Teh đak sơkơ̆t hơdăh Việt Nam păng UAE đei lơ tơdrong jang hơ iă gơ̆h jang hơdoi păng ‘meh vă rim Kŏng ty lăng hơlen tơmơ̆t jên jang rim tơdrong jang ŭnh hơyuh tơ̆ Việt Nam.