Kơ iĕng Thủ tướng hôn bơnê dôm tơdrong tơgop kơtang đơ̆ng VNPT lơ̆m jăl jang ou ki, mă kăl hơnăp jang tơm lơ̆m atŏk tơ iung Khul kơdră bơ̆ jang điên tư, tơplih kơsô̆ teh đak păng vei lăng tơdrong pơm tơm kơdih lơ̆m mạng. Mă đơ̆ng tơjră hăm lơ tơdrong tơnap tap lơ̆m teh đak păng apŭng plĕnh teh, VNPT oei sơkơ̆t hơdăh hơnih dơ̆ng lơ̆m tơdrong jang viễn thông, kmăi kmŏk. Kơ iĕng Thủ tướng Nguyễn Hòa Bình athei Đảng bộ VNPT hơnơ̆ng jang kiơ̆ ‘lơ̆ng jơhngơ̆m đon tơchăr, atŏk kơtang chă tơcheng hơlen, jang kmăi kmŏk gơh hơgei, pơchoh trong pơjing đei hơyak atŏk tơ iung pran kơtang hloh. VNPT kăl pơm jŭk yŭk trong hơlou lơ̆m jang kiơ̆ Tơdrong tơchơ̆t 57 đơ̆ng Hơnih tơm Chinh trĭ găh atŏk tơ iung khoa hŏk, kmăi kmŏk păng tơplih kơsô̆ teh đak.