Tơ̆ dêh char Hậu Giang, Kơ iĕng Thủ tướng Teh đak Trần Hồng Hà atŭm hăm khul bơ̆ jang kơ Khul kơdră Teh đak hlôi đei ‘măng bơ̆ jang hăm rim hơnih bơ̆ jang păng rim dêh char tơring Tơmăn đak kroong Cửu Long găh tơmam drăm tơgŭm ăn rim tơdrong jang pơm trong nơnăm lơ̆m tơring.

Kiơ̆ đơ̆ng Hơnih tơm vei lăng Trong gre nơnăm, hrei au lơ̆m tơring Tơmăn đak kroong Cửu Long tŏk bŏk tơmơ̆t jên jang 8 tơdrong vă jang trong gre rĕnh păng 5 tơdrong vă jang ming hơmet, pơih să, ming man ‘nao rim trong glung, hăm kon jên tơmơ̆t jang dang 112.600 ti hlak jên. Đơ̆ng dang ei truh sơnăm 2025, tơdrong ‘mĕh vă đei chuơ̆h ăn rim tơdrong jang pơm trong gre rĕnh tơring Tơmăm đak kroong Cửu Long tôch kơ lơ, dang hloh 50 triu m3. Pơma pơtôch tơ̆ hop akŏm, Kơ iĕng Thủ tướng Teh đak Trần Hồng Hà tơbăt, kiơ̆ chă hơlen ‘nŏh đei tơmam drăm oei măh mai ăn iung jang ming man rim tơdrong vă jang, mă kăl đei dơ̆ng teh tơ̆ Long An, mă lei Hơnih tơm vei lăng trong gre nơnăm kăl hrôih hơlen hơdăh teh au ‘lơ̆ng kơnê̆ lơ liơ. Hăm rim tơring Tơmăn đak kroong Cửu Long, Kơ iĕng Thủ tướng Teh đak athei iŏk yua tŏk dơ̆ng 50% rim hơnih kôch chuơ̆h dang ei tŏk bŏk bơ̆ jang.