Kơmăng hei păng pơgê  ou (29/9), 'mi kial kơsô̆ 10 Bualoi hăm kial phŭt huơ̆r kơtang păng 'mi tih hlôi pơrăm lơ dêh char tơring tŏk bŏk, pơrăm hli hlơt hăm kon bơngai păng mŭk drăm. Đơ̆ng pơgê hrôih, tơ̆ dêh char Quảng Trị đei 12 'nu bơngai hiong. Ah tơhlu truh Nghệ An – Hà Tĩnh, 'mi kial hơdu ƀiơ̆, 'mi đunh; hlôi đei 13 'nu bơngai lôch păng hiong, 2 'nu rơka. Hơdrol kơ noh, ah kơsơ̆ năr 28/9, tơ̆ Thanh Hóa, Phŏ Thủ tướng Trần Hồng Hà pơgơ̆r tơdrong hop akŏm kơtă păng trư̆k tuyê̆n hăm dôm tơring đơ̆ng Thanh Hóa truh Đà Nẵng vă tơlĕch trong jang tang găn păng tơjră 'mi kial kơsô̆ 10.

Phŏ Thủ tướng pơgơ̆r hăm rim tơring dah akŏm khul jang tơlĕch trong vei sơđơ̆ng ăn tôm kon pơlei, mă kăl noh tơrĕk truh tơdrong đei ƀôh đơ̆ng rŏng kơ 'mi kial. Rim tơring groi kông athei kơchăng yông kon pơlei truh oei anih sơđơ̆ng, hơmet tôm tơmam drăm păng khul jang kiơ̆ pơkăp “4 tơ̆ tơring” vă tơjră tơtom, tang găn đei tơdrong răm hăm kon bơngai păng mŭk drăm.