Đơ̆ng rŏng hloh 1 giĕng bơ̆ jang kiơ̆ khul kơdră chĕp pơgơ̆r 2 kâp, tơring Ia Dom hlôi pơm keh đang 120 kô sơ. Mă lei tơring jei tŏk bŏk tơƀơ̆p tơnap tap kơ yuơ hơnih bơ̆ jang tim mă sơđơ̆ng; kmăi kmŏk păng tơdrong bơ̆ jang kmăi kmŏk kơ kang ƀô̆ tim mă gan ‘lơ̆ng ... Ƀok  Phạm Anh Tuấn – Kơdră chĕp pơgơ̆r Hơnih vei lăng kon pơlei dêh char Gia Lai tơbăt, khei năr kơnh, khul kơdră chĕp pơgơ̆r tơring gô đei pơjao tơdrong jang hơdăh, gơ̆h tơchơ̆t lơ tơdrong jang vă atŏk tơ iung mŭk drăm-tơring. Khul kơdră tơring kăl pơchoh trong, pơtho tơbăt ăn kon pơlei atŏk tơ iung choh jang sa dôm tơdrong đei, trŏ lăp hăm tơdrong đe ‘meh vă răt iŏk, krao hơvơn hơnih mơdro sa tơmơ̆t jên jang pơm tơlĕch, tơgŭm djru choh jang sa. Dêh char gô pơjao trong pơkăp atŏk tơ iung hơdăh ăn tơring, pơjao KPI ăn pơ đĭ Ƀĭ thư hăm Kơdră chĕp pơgơ̆r Hơnih vei lăng kon pơlei tơring, tơdăh jang ưh kơ kĕ keh đang gô chiu pŭ hơnăp jang.