Vă ƀlŏk hơdơ̆r tơdrong tơgop tih tên đơ̆ng rim kơdră so, lơ̆m ‘măng năm bơ̆ jang tơ̆ dêh char Vĩnh Long, pơgê năr 4/9, Kơdră chĕp pơgơ̆r Kuôk hô̆i Trần Thanh Mẫn hlôi soh hlôt nhang, glơng ‘măn gơvang pơkao tơ̆ Hơnih Man tơbăt Kơdră chĕp pơgơ̆r Jơnŭm Khul kơdră chĕp pơgơ̆r teh đak Phạm Hùng păng Hơnih man tơbăt Thủ tướng so Võ Văn Kiệt.

Chih ƀlŏk tơbăt nơ̆r tơ̆ ou, Kơdră chep pơgơ̆r Kuôk hô̆i Trần Thanh Mẫn pơma tơbăt jơhngơ̆m đon ‘mêm tôch bat hmach tôch kơ dêh păng chơt hơ iă đei năm soh hlôt nhang tơ̆ hơnăp yang hơbang Kơdră chĕp pơgơ̆r Jơnŭm Khul kơdră chĕp pơgơ̆r teh đak Phạm Hùng - Bơngai Kơdră đei yom kơtang hloh kơ Đảng, Teh đak bơ̆n, bơngai kon hơ ‘lơ̆p nuih mơng gơh hơgei hloh kơ pơlei pơla Vĩnh Long nuih mơng. Soh hlôt nhang, glơng ba gơvang pơkao Hơnih man tơbăt Thủ tướng so Teh đak Võ Văn Kiệt, tơ̆ apŭng Vũng Liêm, Kơdră chĕp pơgơ̆r Kuô̆k Hôi Trần Thanh Mẫn atŭm hăm khul bơ̆ jang hlôi pơma tơbăt jơhngơ̆m đon kŭp yom kơtang hăm Thủ tướng so Võ Văn Kiệt, bơngai hlôi plang đĭ jơhnơr ăn bơ̆ jang kĕch mang, ling lang mĭnh nơ̆r ƀơ̆r đon hăm teh đak, gơ̆h găt băt ‘mêm kơ eng hăm kon pơlei, oei sa ‘lơ̆ng hơ iă, ling lang lăng tơdrong jang pơyoa ăn kơ Đảng, kơ Teh đak, kơ kon pơlei ‘noh tơm hloh kăl hloh; jĭ mĭnh ‘nu bơngai đei jơhngơ̆m đon ‘lơ̆ng rŏ hơbŏ nhen hloh lơ̆m jơhngơ̆m đon kĕch mang; mĭnh ‘nu bơngai kŏng san tơpăt joe hăm jơhngơ̆m đon dim rơnim ling lang vang vơch lơ̆m jơhngơ̆m đon kon pơlei păng bôl boăl apŭng plĕnh teh.