Iung pơma tơ̆ jơ tơƀơ̆p, Kơdră chĕp pơgơ̆r Kuô̆k hô̆i athei Kơdră chĕp pơgơ̆r rim Hơnih tang măt Việt Nam tơ̆ teh đak đe kăl atŏk kơtang hlŏh dơ̆ng tơgoăt tơgoăl ƀar păh Kuô̆k hô̆i teh đak bơ̆n hăm hơnih bơ̆ jang pơjing khôi luơ̆t teh đak đe vă pơjing tơgoăt tơgoăl ‘lơ̆ng hơ iă hăm rim Nghĭ sy kơ teh đak đe. Tơ̆ jơ sơng, Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh, jang tơbôl tơgop tôch gĭt kăl vă teh đak đei hơnăp jang, tơdrong lui yom păng hơnih dơ̆ng lơ̆m apŭng plĕnh teh nhen hrei au.

Hơdrơ̆k dơ̆ng, hơnih dơ̆ng, hơnăp jang, tơdrong yom kiơ̆ kơ teh đak hrei au jei pơjing rơvơn ăn pơđĭ pran kơtang, pơjing rơvơn ăn bơ̆ jang tơbôl. Tơm dơnơm kơ jang tơbôl rim teh đak ‘nŏh Việt Nam bơ̆n ‘nŏh jing jơhngơ̆m pran tôm tong. Kơdră chĕp pơgơ̆r Kuô̆k hô̆i athei, Kơdră chĕp pơgơ̆r rim Hơnih tang măt Việt Nam tơ̆ teh đak đe tơgop kơtang lơ̆m vei lăng kơjăp pơm tơm kơdih, pơm tơngla, rơngei keh kong, vei lăng keh kong kơ Teh đak, vei lăng sơđơ̆ng teh đak “đơ̆ng hrôih, đơ̆ng hơtăih”, vei lăng tơdrong hiôk hian păng hơnŭk hơnoa kơ kon pơlei. ‘Nau jing tơdrong jang kăl hloh, hơnơ̆ng hloh, đunh đai tai sơnăm, gĭt kăl hloh kăl chĕp răk tơƀăk mong, ƀlŏk hơdơr kơtang păng jang kiơ̆ tơnăp.