Tơ̆ Hop akŏm, Jơnŭm vei lăng pôk rơih teh đak pơma dơnuh, ăn tơgop nơ̆r găh: Trong vă pơjing hla bơar chih tơbăt tơdrong jang kơ Jơnŭm vei lăng pôk rơih Teh đak găh tơlĕch bơ̆ jang hơmet ăn pôk rơih Kơdră tang măt Kuô̆k hô̆i jăl XVI păng kơdră tang măt Jơnŭm vei lăng kon pơlei rim hơnih jăl jang 2026 - 2031 đơ̆ng mă đơ̆ng rŏng ‘măng hop akom mă blŭng truh dang ei păng mĭnh ƀar tơdrong jang kăl lơ̆m khei năr kơnh; tơchĕng lăng tơdrong pơgơ̆r, dôm tơdrong jang păng trong proh hơmet ăn pơgơ̆r Hop akŏm lơ̆m teh đak găh tơlĕch jang kiơ̆ bơ̆ jang pôk rơih kơdră tang măt Kuô̆k hô̆i jăl XVI păng jơnŭm vei lăng kon pơlei rim hơnih jăl jang 2026 - 2031; Tơdrong tơchơ̆t pơjing hô sơ bơngai tang măt Kuô̆k hô̆i jăl XVI păng Kơdră tang măt jơnŭm vei lăng kon pơlei jăl jang 2026 - 2031. Iung pơma pơtôch hop akom, Kơdră chĕp pơgơ̆r Kuô̆k hô̆i Trần Thanh Mẫn athei rim tơdrong jang pơchoh trong kăl akŏm hloh dơ̆ng vă sơđơ̆ng ƀlep trŏ ‘lơ̆ng, đơ̆ng hrôih, đơ̆ng hơtăih. Găh trong vă pơgơ̆r Hop akŏm lơ̆m teh đak, Kơdră chĕp pơgơ̆r Kuô̆k hô̆i athei kăl tơplih ‘nao Hop akŏm tơlĕch jang kiơ̆ 2 păh, đei pơma dơnuh dih băl, mă kăl lơ̆m khei ‘năr khul kơdră ‘nao, kăl mă hơlen, mă hơdăh, nơ̆r tơgop, tơblang ăn mă hơdăh, mă kiăp, mă ƀlep tơpă.