Rim bơngai tăh hla chă hơpĭnh Kơdră chĕp pơgơ̆r Kuô̆k hô̆i Trần Thanh Mẫn hăm Khul kơdră tang măt Kuô̆k hô̆i dêh char Hậu Giang lơ tơdrong đei ƀơm truh găh răt yua ƀao hiêm jang pơgang, ƀao hiêm tơpôl; găh tơdrong tơgŭm djru groi teh, hrŭ ăn pơjing hơnih oei hle; kơsơ̆p hla bơar hŏk pơhrăm, tơdrong tơgŭm jru ăn rim kô pơtho mâm non; bơ̆ jang tang găn sa pơgơ̆p pơjĭp đơ̆ng Đảng ... Pơma dơnuh hăm bơnga tăh hla, Kơdră chĕp pơgơ̆r Kuô̆k hô̆i Trần Thanh Mẫn hlôi tơroi tơbăt găh tơdrong atŏk tơ iung mŭk drăm-tơpôl kơ teh đak bơ̆n; dôm tơdrong rơvơn păng tơnap tap kơ lơ̆m teh đak, kơ apŭng plĕnh teh. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, tơ̆ hơnăp tơdrong ou, Kuô̆k hô̆i hlôi păng tŏk bŏk tơplih ‘nao jơhngơm đon, trong tơ iung pơjing khôi luơ̆t kiơ̆ trong ƀôh dôm tơdrong tim mă lăp, tơdrong tơnap tap vă hơmet ming Khôi luơ̆t, Tơdrong tơchơ̆t. Kơ yuơ lơ loh, tơdrong tơ iung pơjing khôi luơ̆t kăl jang kiơ̆ đơ̆ng ƀôh hơdăh yan ou, jang răh hơlen răh, lăng kon pơlei păng hơnih mơdro sa ‘noh tơm hloh, tơtom hơmet pơ ‘lơ̆ng tơnap tap.