Pơgê năr 22/9, Đang ƀô̆ dêh char Khánh Hòa pơgơ̆r blŭng a Hop akom tih Kơdră tang măt ‘măng mă I, jăl jang 2025-2030, hăm vang năm đơ̆ng Kơdră chĕp pơgơ̆r Kuô̆k hô̆i Trần Thanh Mẫn atŭm hăm rim kơdră rim Hơnih tơm, hơnih bơ̆ jang păng 396 ‘nu bơngai tang măt. Iung pơma pơrô̆ jang, Kơdră chĕp pơgơ̆r Kuô̆k hô̆i hôn bơnê dôm tơdrong iŏk đei jơnei kơ dêh char Khánh Hòa lơ̆m 5 sơnăm ou ki păng pơma hơdăh Hop akom tih ou jing tơdrong pơgơ̆r chinh trĭ gĭt kăl, pơih đei jăl trong atŏk tơ iung ‘nao. Kơdră chĕp pơgơ̆r Kuô̆k hô̆i Trần Thanh Mẫn pơchoh ăn 6 tơdrong jang tơm, lơ̆m ou lăng kơjăp tơ iung pơjing Đảng, khul jang chinh trĭ rơgoh ‘lơ̆ng, pran kơtang păng bơ̆ jang kang ƀô̆ “tơdrong kăl kơ tơdrong kăl”. Khánh Hòa kăl tơlĕch jang ‘lơ̆ng tơdrong rơvơn jih đak dơsĭ hơtăih 500km, lơ ving păng bol dơsĭ, mă kăl Achon dơsĭ Trường Sa, vă atok tơ iung mŭk drăm đak dơsĭ, kmăi kmok ŭnh hơyuh, pơm tơlĕch tơmam drăm, kmăi kmŏk hơgei, logistics păng tơmang pơhiơ̆ hơtŏ hăm apung plĕnh teh, sơkơ̆t hơdăh hơnih dơ̆ng ‘nao lơ̆m trong tơplih ‘nao păng vang mơ̆t hơdoi.