Tơ̆ jơ pơm lêh, Bí thư Đảng khul Kuô̆k hô̆i, Kơdră chĕp pơgơ̆r Kuô̆k hô̆i Trần Thanh Mẫn hlôi pôk ăn Huy hiê̆u 65 sơnăm jang Đảng ăn Kơdră so chĕp pơgơ̆r Kuô̆k hô̆i Nguyễn Văn An. Iung pơma tơ̆ jơ pơm lêh, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, lơ̆m khei năr tơ iung pơjing păng atŏk tơ iung Teh đak, Đảng hlôi chĕp pơgơ̆r Kĕch mang Việt Nam yak hloh tơnap tap, tơdrong long, iŏk đei jơnei gĭt kăl; Kuô̆k hô̆i Việt Nam dôm sơnăm ou ki jei hlôi đei lơ tơdrong tơplih ‘lơ̆ng hơ iă, bơ̆ jang ‘lơ̆ng, đei bơngai tăh hla păng kon pơlei hôn bơnê. Tơgop lơ̆m tơdrong jơnei atŭm ‘noh, đei tơdrong vang tơgop đơ̆ng rim jơhnơr kang ƀô̆, đảng viên kơ Đảng ƀô̆ Hơnih bơ̆ jang Kuô̆k hô̆i, mă kăl ‘noh dôm tơdrong tơgop tih tên, gĭt kăl đơ̆ng Kơdră so chĕp pơgơ̆r Kuô̆k hô̆i Nguyễn Văn An lơ̆m bơ̆ jang tơ iung pơjing păng vei lăng Teh đak, pơsư̆ ăn dôm trong jang hơ iă dăh mă tơgŭm ăn Kuô̆k hôi rim jăl đơ̆ng rŏng hơnơ̆ng kiơ̆ yok rok jơ̆ng, jang kiơ̆.