Kơdră chĕp pơgơ̆r Kuô̆k hô̆i hôn bơnê kơtang bơ̆ jang tơƀôh tơbăt trong bơ̆ jang, Dơnih tơm vei lăng Kơtơ̆ng ang păng Pơre nơ̆r hlôi hơdrin iung jang pơchoh trong ăn Khul kơdră Teh đak vă pơm tơplih jơhngpơ̆m đon hlôh vao, trong iung jang lơ̆m bơ̆ jang tơƀôh tơbăt trong bơ̆ jang rim hơnih bơ̆ jang Teh đak. Kiơ̆ kơ ‘nŏh, bơ̆ jang tơbăt trong bơ̆ jang teh đak kăl đei lăng jing mĭnh tơdrong jang kơ khul kơdră chĕp pơgơ̆r.

Lơ̆m bơ̆ jang tơ iung pơjing, pơm pơkeh tơdrong pơkăp, tơchơ̆t, Hơnih tơm vei lăng jang Kơtơ̆ng ang păng Pơre nơ̆r hlôi iung jang kơtang, vang pơchoh trong ăn Khŭl kơdră Teh đak vă pơtruh ăn Kuô̆k hô̆i pơdrơ̆ng kiơ̆ Khôi luơ̆t sơđơ̆ng Mạng, Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Tần sô̆ vô tuyên điê̆n. Hrei au, tơdrong vă jang Khôi luơ̆t Bơ̆ jang điên tư (hơmet ming) hlôi đei Kuô̆k hô̆i ăn tơgop nơ̆r ‘măng mă blŭng, tơchĕng hơlau Kuô̆k hô̆i gô pơdrơ̆ng kiơ̆ tơ̆ ‘Măng hop akŏm mă 5 truh au kơnh. Tơdrong vă pơjing Khôi luơ̆t Viễn thông (hơmet ming) kơ yuơ Hơnih tơm pơm tơngla chih tơlĕch hlôi đei tơmơ̆t lơ̆m Tơdrong jang tơ iung pơjing khôi luơ̆t, tơdrong tơchơ̆t khôi luơ̆t tơm sơnăm 2023.