Tơ̆ ‘măng pơma đam, Kơdră chĕp pơgơ̆r Kuô̆k hô̆i Vương Đình Huệ athei Trung Quốc lăng ba, pơih să răt tơmơ̆t tơmam drăm, mă kăl tơmam drăm choh jang sa tơm kơ Việt Nam, pơjing jơ rơvơn ăn tơmam drăm Việt Nam gơ̆h tĕch mơdro tơ̆ teh đak mă 3 ‘moi kiơ̆ jăl trong gre treng Á - Âu; pơtrŭt kơtang hrôih đei rim tơdrong vă jang tơmơ̆t jên jang kơtang, ‘lơ̆ng ăn tơdrong jang atŏk tơ iung kơ Trung Quốc tơ̆ Việt Nam; atŏk kơtang tơgoăt trong nơnăm vă tơgum ăn mơ̆t lĕch dih băl kơ kon pơlei ƀar teh đak.

Kơdră chĕp pơgơ̆r Kuôk hô̆i Trung Quốc Triệu Lạc Tế athei ƀar păh atŏk kơtang tơƀơ̆p pơma dơnuh dih băl khul Đảng, mă kăl pơma dơnuh dih băl trong jang tơm ƀar păh Kơdră kơpal vă pơchoh trong ăn tơgoăt tơgoăl ƀar Đảng, ƀar Teh đak; hơdrin atŏk kơtang rim tơdrong vă jang tơmơ̆t jên jang; sơkơ̆t hơdăh Trung Quốc pơjing jơ rơvơn ‘lơ̆ng hơ iă hloh vă tơmam drăm choh jang sa Việt Nam pơih să tĕch mơdro tơ̆ Trung Quốc.