Lơ ƀai chih đơ̆ng rim bơngai lơ̆m Khul Bơngai drŏ kăn chih kơtơ̆ng ang Việt Nam tôch ‘lơ̆ng hơ iă, tơbăt hơdăh găh tơdrong erih sa, tơgop lơ̆m ‘măng tơplih ‘nao, atŏk tơ iung teh đak, lơ ƀai chih hlôi iŏk đei tơmam hơpăh lơ̆m rim ‘măng pơlong chih kơtơ̆ng ang kơ rim tơring, hơnih tơm, hơnih bơ̆ jang, khul ƀô̆ đô̆i kŏng ang păng Tơmam hơpăh chih kơtơ̆ng ang Teh đak.

Iung pơma tơ̆ jơ tơƀơ̆p muh măt, Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh, Kuô̆k hô̆i rim jăl jei lăng kơjăp hơnăp jang kơ khul chih kơtơ̆ng ang, mă kăl rim hơnih bơ̆ jang tang măt ăn kon pơlei đơ̆ng Trung ương truh tơ̆ tơring jei đei bơngai tang măt ăn rim hơnih bơ̆ jang chih kơtơ̆ng ang. Lơ̆m khei năr kơnh, Kơdră chĕp pơgơ̆r Kuô̆k hô̆i athei khul chih kơtơ̆ng ang lơ̆m teh đak bơ̆n kăl tơlĕch jang kiơ̆ kơjăp, tôm tong, kơtang hlŏh dơ̆ng trong iung bơ̆ jang, chih kơtơ̆ng ang ‘nŏh jing trong bơ̆ jang kăl hloh, jing trong jang tơm kơ Đảng lơ̆m pơjing đei kơhngơ̆m đon ‘lơ̆ng. Ƀlep lơ̆m jơ ‘năr au, Kơdră chĕp pơgơ̆r Kuô̆k hô̆i hmach chơt hơ iă ăn rim bơngai drŏ kăn bơ̆ jang chih kơtơ̆ng ang păng Khul drŏ kăn chih kơtơ̆ng ang Việt Nam “ling lang oei lơ̆m 20 sơnăm” nhen jơhngơ̆m đon kơ Bơngi lôch dŏng teh đak, ƀak si Đặng Thùy Trâm; ling lang vei kơ jăp “Jơhngơ̆m đon ‘lơ̆ng, tơpăt, nơ̆r trŏ lăp” păng tơpă jing “Dôm pơkao trang hăm mam”.