Tơ̆ jơ bơ̆ jang, Bí thư Đảng ƀar dêh char hlôi đŏk tơbăt hla bơar chih tơbăt bơ̆ jang chinh trĭ, hla bơar hơlen hơdăh tơdrong bơ̆ jang, găh dôm khul kơdră păng trong vă pơjing tơdrong tơchơ̆t. Rim kơdră tang măt hôn bơnê kơtang dôm tơdrong iŏk đei, adoi athei pơm hơdăh hloh dơ̆ng trong hơmet pơ ‘lơ̆ng dôm tơdrong tim mă hơ iă, hơmet pơ ‘lơ̆ng tơdrong tơhlăk tơhlĭn atŏk tơ iung, xơkơ̆t hơdăh tơdrong jang tơm, trong pơchoh ăn atŏk tơ iung truh sơnăm 2045. Pơma pơtôch hop akŏm, Kơdră chĕp pơgơ̆r Teh đak Lương Cường hôn bơnê dôm tơdrong hơdrin đơ̆ng ƀar dêh char, lăp đon hăm trong pơjing tơdrong tơchơ̆t, athei tơgoăt iŏk nơ̆r tơgop đơ̆ng Hơnih tơm Chinh trĭ, mă kăl ‘noh nơ̆r pơrô̆ đơ̆ng Tổng Bí thư Tô Lâm, vă pơm keh đang. Kơdră chĕp pơgơ̆r teh đak athei tơ iung pơjing tơdrong jang hơdăh, hơdăh bơngai, hơdăh tơdrong jang, hơdăh jang tĕnh koăng lơ liơ, gơh tơlĕch jang hloi lăp đơ̆ng rŏng Hop akŏm tih, sơđơ̆ng trŏ lăp hăm trong atŏk tơ iung lơ̆m chăl hle.