Kơsơ̆ năr 10/9 tơ̆ Hơnih bơ̆ jang Kơdră chĕp pơgơ̆r teh đak, Kơdră chĕp pơgơ̆r Teh đak Lương Cường hăm hơkăn Ƀok hlôi pơm tơm Pơm lêh pơma đam hăm Kơdră chĕp pơgơ̆r Australia yă Sam Mostyn păng Klo yă năm tơmang Việt Nam. Lăp đơ̆ng rŏng Pơm lêh sơng, Kơdră chĕp pơgơ̆r teh đak Lương Cường hlôi pơma đam hăm Kơdră chĕp pơgơ̆r Australia Sam Mostyn.  Ƀar păh akhan, tơdrong pơm hơtŏk tơgoăt tơgoăl jing Jang hơdoi gĭt kăl Tôm tong khei 3/2024 jĭ mĭnh hơyak gĭt kăl hloh, ba tơgoăt tơgoăl dih băl atŏk tơ iung kơtang. Ƀar teh đak jing teh đak jang hơdoi dih băl kơtang lơ̆m mơdro sa hăm mơdro sa iŏk đei hloh 14 ty USD lơ̆m sơnăm 2024, tơmoi năm tơmang pơhiơ̆ dih băl kơ ƀar păh tŏk kiơ̆ rim sơnăm. Rim hơnih mơdro sa kơ Australia hlôi păng tŏk bŏk pơjing rơvơn vă atŏk tơ iung tơmơ̆t jên jang mơdro sa tơ̆ Việt Nam. Việt Nam hlôi hơdrin đĭ ai đei jing gơng tơroh kloh klĕch vă Australia atŏk kơtang tơgoăt dih băl hăm tơring Đông Nam Á, tơgop pơtrŭt kơtang tơgoăt tơgoăl Jang hơdoi Gĭt kăl Tôm tong Australia – ASEAN păng jang hơdoi tơpă ƀar păh Australia hăm Tơring iĕ Mekong. Kơdră chĕp pơgơ̆r Australia hôn bơnê kơtang tơdrong tơgop gĭt kăl đơ̆ng dang 350.000 ‘nu bơngai Việt tơ̆ Australia, vă jê̆ 40.000 ‘nu sinh viên Việt Nam tŏk bŏk hŏk pơhrăm, chă tơchĕng hơlen tơ̆ Australia; pơma hơdăh tơdrong năm ngôi dih băl ‘lơ̆ng hơ iă jing hơyak kơjăp iăp kơtang ăn tơdrong tơgoăt tơgoăl dih băl. Ƀar păh drơ̆ng mĭnh nơ̆r tơlĕch jang kơtang hloh dơ̆ng rim trong jang vă atŏk kơtang jang hơdoi mŭk drăm dih băl, lăng truh tĕch mơdro dih băl iŏk đei 20 ti USD păng tŏk hloh ƀar ‘măng kon jên tơmơ̆t jang dih băl lơ̆m dôm sơnăm kơnh. Australia hơnơ̆ng iung jang hơdoi kơjăp, tơgŭm djru trong bơ̆ jang đơ̆ng Việt Nam păng ASEAN lơ̆m sơđơ̆ng vei lăng sơđơ̆ng teh đak, sơđơ̆ng dơ̆ng kơjăp păng duk kơdou, gre păr chă par hiôk hian tơ̆ Biển Đông; xek tơlang tơdrong tơgar dih băl kiơ̆ trong rơngei hiôk hian ‘moi kiơ̆ yom kiơ̆ khôi luơ̆t apŭng plĕnh teh.