Gơmăng hei, tơ̆ Bắc Kinh, Trung Quốc, pơtôch ‘măng tơƀơ̆p dih băl, Kơdră chĕp pơgơ̆r teh đak Lương Cường hlôi pơma dơnuh hăm Ƀok kơdră tơm Nga Vladimir Putin. Kơdră chĕp pơgơ̆r Teh đak sơkơ̆t hơdăh, Việt Nam lăng kơjăp tơgoăt tơgoăl hăm Nga, tơgŭm djru Nga atŏk tơ iung sơđơ̆ng, pran kơtang păng iung jang ‘lơ̆ng hơnăp jang đĭ ai lơ̆m tơdrong apŭng plĕnh teh, pơtrŭt kơtang jang hơdoi Nga - ASEAN. Kơdră chĕp pơgơ̆r Teh đak pơma hơdăh, Việt Nam hôn bơnê hơnih mơdro sa Nga tơmơ̆t jên jang lơ̆m rim hơnih jang kmăi kmŏk, jang hơdoi pơm tơlĕch pơgang, kmăi kmŏk kơsô̆… Ƀar ‘nu kơdră drơ̆ng mĭnh nơ̆r hơmet pơ ‘lơ̆ng tơgoăt tơgoăl chinh trĭ-tơpôl, tơlĕch jang kiơ̆ jơnei rim tơdrong drơ̆ng mĭnh nơ̆r iŏk đei lơ̆m ‘măng năm tơmang đơ̆ng Ƀok Kơdră tơm Nga Putin truh tơ̆ Việt Nam ƀơ̆t khei 6/2024 păng 'măng năm tơmang teh đak Nga đơ̆ng Tổng Bí thư Tô Lâm khei 5/2025; adoi atŏk kơtang ăn khul kơdră kơpal tơƀơ̆p pơma dơnuh dih băl. Ƀar păh sơkơ̆t hơdăh, hơdrin kơtang jang hơdoi mŭk drăm-mơdro sa, tơmơ̆t jên jang, tơgăl hăm tơdrong tơgoăt tơgoăl chinh trĭ ‘lơ̆ng hơ iă păng tơdrong đei tih tên kơ ƀar teh đak.