Hmach chơt hơ iă ăn rim Kơdră tang măt teh đak iŏk bơ̆ jang tơ̆ Việt Nam, Kơdră chĕp pơgơ̆r teh đak pơma hơdăh, hăm tơdrong joăt jang, jơhngơ̆m đon ‘măn ăn kơ teh đak, kon bơngai Việt Nam, tơdrong tơgum djru đơ̆ng rim hơnih bơ̆ jang Việt Nam, rim kơdră tang măt gô bơ̆ jang keh đang, bơ̆ jang ‘lơ̆ng tơdrong jang lơ̆m jăl jang kơdih.

Sơng pơma dơnuh hăm Kơdră tang măt teh đak Rim teh đak iĕ jing mĭnh Ả-rập (UAE), Kơdră chĕp pơgơ̆r teh đak Võ Văn Thưởng akhan, ƀar teh đak kăl đei trong jang hrôih hơnhăk jang sa iŏk đei kơ ƀar păh truh 10 ti dolar. Ƀar păh jei kăl atŏk kơtang tơgoăt tơgoăl chinh trĭ, tơbôl.

Sơng pơma dơnuh hăm Kơdră tang măt teh đak Sri Lanka Sajeewa Umanga Mendis, Kơdră chĕp pơgơ̆r Teh đak Võ Văn Thưởng  sơkơ̆t hơdăh, Việt Nam hơnơ̆ng lăng kơjăp atŏk tơ iung tơgoăt tơgoăl joăt joe păng jang hơdoi lơ tơdrong hăm Sri Lanka. Ƀar păh jei kăl pơtrŭt kơtang jang hơdoi mơdro sa, tơmơ̆t jên jang, tơbăt dih băl trong jang gơ̆h hơgei lơ̆m xut xa pơngot rơvĕt, tơjur dơnuh, atŏk tơ iung kon bơngai, pơtho pơhrăm, jang pơgang, jŏh ayŏ kơdŏ soang.

Sơng pơma dơnuh hăm Kơdră tang măt teh đak Chile, Kơdră chĕp pơgơ̆r Teh đak Võ Văn Thưởng chơt hơ iă mưh ƀôh tơdrong tơgoăt tơgoăl Việt Nam – Chile hơnơ̆ng đei hơmet pơ’lơ̆ng, ƀar teh đak gơ̆h atŏk kơtang jang hơdoi vă atŏk tơdrong tơgoăt tơgoăl dih băl ‘lơ̆ng hơ iă hloh dơ̆ng lơ̆m khei năr kơnh.