Lơ̆m ‘măng iung năm tơmang teh đak Cộng hoà Cuba, pơgê năr 19/4, (kiơ̆ jơ teh đak Cuba ‘nŏh jing gơmăng năr 19/4 kiơ̆ jơ ‘năr Việt Nam) tơ̆ Hơnih tơm La Habana, Kơdră chĕp pơgơ̆r Kuô̆k hô̆i Vương Đình Huệ hăm Khul Kơdră tang măt Kuô̆k hô̆i Việt Nam năm ngôi, pơma dơnuh hăm kang ƀô̆, bơngai jang Hơnih tang măt Việt Nam păng dôm bơngai tang măt ăn Kon pơlei Việt Nam tơ̆ Cuba.

Iung pơma tơ̆ jơ tơƀơ̆p, Kơdră chĕp pơgơ̆r Kuô̆k hô̆i Vương Đình Huệ tơbăt jơhngơ̆m đon chơt hơ iă đei năm tơmang dơ̆ng tơ̆ teh đak Cuba ‘lơ̆ng liĕm; tơƀơ̆p pơma dơnuh hăm kang ƀô̆, bơngai jang Hơnih tang măt Việt Nam păng dôm bơngai tang măt ăn kon pơlei Việt Nam oei tơ̆ Cuba, mĭnh teh đak hơtăih hơtŏ kơ pơlei pơla. Kơdră chĕp pơgơ̆r Kuô̆k hô̆i tơbăt, ‘nau ‘măng năm tơmang kơdră kơpal kơ Việt Nam truh hăm Cuba jô̆ đơ̆ng sơnăm 2022 truh dang ei. ‘Ngoăih dôm tơdrong jang tơm kơ khul oei đei rim tơdrong jang kơ rim bơngai lơ̆m khul, rim hơnih tơm, hơnih bơ̆ jang, tơring, hơnih mơdro sa vă atŏk kơtang jang hơdoi kơ ƀar teh đak. Kơdră chĕp pơgơ̆r Kuô̆k hô̆i Vương Đình Huệ athei Kơdră chĕp pơgơ̆r Hơnih tang măt, Hơnih tang măt Teh đak, khul mơdro sa tŏk bŏk tơmơ̆t jên jang tơ̆ Cuba lang să jang jơnei; atŏk kơtang jang hơdoi. Kơdră chĕp pơgơ̆r Kuô̆k hô̆i ‘mĕh vă, kon pơlei Việt Nam tơ̆ Cuba hơnơ̆ng vei lăng năng tông dih băl ‘lơ̆ng hơ iă, tơgoăt tơgoăl pôm nơ̆r ƀơ̆r đon hloh dơ̆ng, vă tơgŭm djru dih băl ‘lơ̆ng hơ iă. Jơhngơ̆m đon, tơdrong jang adoi nhen teh đak Cuba.