‘Măng iung năm tơmang Teh đak Lào đơ̆ng Kơdră chĕp pơgơ̆r Teh đak tơbăt hơdăh tơdrong tơgŭm djru kơtang, tôm tong đơ̆ng Việt Nam hăm tơdrong jang tơplih ‘nao, hơmet pơ ‘lơ̆ng păng atŏk tơ iung Mŭk drăm-Tơpôl, vang mơ̆t hơdoi apŭng plĕnh teh kơ teh đak boăl Lào.

Lơ̆m jơ ‘năr tơmang teh đak Lào, Kơdră chĕp pơgơ̆r Teh đak Võ Văn Thưởng đei ‘măng pơma dơnuh păng atŭm hăm Tổng Bí thư, Kơdră chĕp pơgơ̆r Teh đak Lào vang năm Pơm lêh kĭ pơkăp jang hơdoi ƀar păh rim Hơnih tơm, hơnih bơ̆ jang, tơring kơ ƀar Teh đak. Kơdră chĕp pơgơ̆r Teh đak jei đei pơma dơnuh hăm Thủ tướng păng Kơdră chĕp pơgơr Lào; sơng pơma dơnuh hăm Kơdră chĕp pơgơ̆r Trung ương Mặt trận Lào tơ iung pơjing teh đak, sơng pơma dơnuh hăm Kơdră chĕp pơgơ̆r Trung ương Khul tơgoăt tơgoăl Lào- Việt Nam; vang năm et sa kơ yuơ Tổng Bí thư, Kơdră chĕp pơgơ̆r teh đak Lào pơgơ̆r; năm ngôi Hơnih tang măt teh đak bơ̆n tơ̆ Lào păng tơƀơ̆p pơma dơnuh hăm dôm bơngai tang măt ăn kon pơlei Việt Nam tơ̆ Lào.