Tang măt ăn rim Kơdră tang măt rim teh đak ASEAN, Kơdră tang măt teh đak Indonesia-teh đak pơm Kơdră chĕp pơgơ̆r ASEAN 2023, pơtruh nơ̆r hmach chơt hơ iă păng nơ̆r apĭnh jet gia pơma dơnuh đơ̆ng Kơdră chĕp pơgơ̆r teh đak Indonesia păng rim Kơdră chĕp pơgơ̆r rim teh đak ASEAN hăm Kơdră chĕp pơgơ̆r teh đak Võ Văn Thưởng.

Kơdră tang măt sơkơ̆t hơdăh, lơ̆m 28 sơnăm au ki, Việt Nam hlôi jing hơnăp jang gĭt kăl lơ̆m atŏk kơtang tơgoăt tơgoăl pôm nơ̆r ƀơ̆r đon păng hơnăp jang tŏk bŏk kơ ASEAN adoi nhen lơ̆m tơ iung pơjing Hơnih dơ̆ng Tơpôl ASEAN đơ̆ng rŏng 2025. Atŏk GDP sơnăm 2022 kơ Việt Nam lơ̆m 8,02% gô pơjing jơhngơ̆m pran ăn atŏk tơ iung mŭk drăm tơring. Kơdră tang măt Indonesia, tang măt ăn Kơdră tang măt rim teh đak ASEAN, pơkăp, rim Kơdră tang măt gô kơrŭn đĭ jơhngơ̆m tơgŭm djru păng tơgop jơnei vă atŏk kơtang hloh dơ̆ng tơgoăt tơgpoăl ƀar păh Việt Nam hăm rim teh đak ASEAN; adoi, tơbăt jơhngơ̆m đon lui, hăm trong chĕp pơgơ̆r ‘lơ̆ng hơ iă đơ̆ng Kơdră chĕp pơgơ̆r Teh đak, tơgoăt tơgoăl jang hơdoi ƀar păh Việt Nam hăm rim teh đak lơ̆m khul ASEAN gô roi năr roi tơgoăt dih băl kơjăp hloh dơ̆ng păng atŏk tơ iung pran kơtang, lang să, tơgop gĭt kăl ăn vei kơjăp rơngei hiôk hian, sơđơ̆ng dơ̆ng kơjăp tơ̆ tơring.