Kơdră Kuôk hô̆i Vương Đình Huệ bơ nê kơ Đảng, teh đak Cuba hlôi ‘măn tơdrong chơt hơiă ‘noh jĭ bơngai tơmoi teh đak đe mă blŭng đei iung pơma tơ̆ hơnăp Kuôk hô̆i Cuba, lăp đơ̆ng rŏng kơ Kuôk hô̆i jăl X pôk đei Khŭl kơdră chĕp kơ̆l ‘nao kơ Teh đak Cuba jăl jang 2023-2028. Kơdră Kuôk hô̆i pơma hơdăh, truh dang ei yak hloh lơ mơmat tat, kơ̆m mơdro sa, jên hu kơtang, sar bar, jĭ hơbuh, Cuba tŏk bŏk iŏk đei lơ jơnei ‘lơ̆ng lơ̆m bơ̆jang kiơ̆ “tơmơ̆t tơdrong jang mŭk drăm ‘lơ̆ng”.

Khei ‘năr pơjei băl lơ̆m apŭng plĕnh teh tŏk bŏk đei ƀôh krê hơmơt, tơdrong ‘noh athei 2 teh đak kăl 1 jơhngơ̆m đon, jang hơdai kơ jăp, vei kơ jăp tơdrong pơkăp hiôk hian, pơm tơm kơdih, jang hơdai hơtŏ băl. Kiơ̆ lơ̆m jơhngơ̆m đon pơma dơnuh, hŏk pơhrăm dih băl, Kơdră Kuôk hô̆i Vương Đình Huệ hlôi tơroi 6 tơdrong tơm găh tơplih ‘nao, hơtŏk ‘lơ̆ng hloh dơ̆ng, đei yua tơdrong jang đơ̆ng Kuôk hô̆i  Việt Nam lơ̆m jăl jang ‘nao. Pơtôch ‘măng hop akŏm đĭ đăng gĭt kăl ‘noh ƀai hơri “Như có Bác Hồ trong ngày vui đại thắng” yua đơ̆ng đe hŏk tro kơ Cuba hơri.