Kiơ̆ nơ̆r tơroi đơ̆ng Anih chĕp kơ̆l đảng dêh char Bình Thuận, sơnăm 2022 păng jăl khei mă 1 sơnăm ‘nâu, mŭk drăm tơ̆ dêh char jang tŏk ming hrĕnh, hơtŏ băl găh 3 tơdrong tơm đei: Kơmăy kơmŏk, chă tơmang lăng păng choh jang xa. Tơdrong jang tŏk atŭm iŏk đei truh 7,75%. Thu mong jên ăn tĕh đak sơnăm sơ̆ đei 11.300 ti, jăl khei mă I sơnăm ‘nâu iŏk đei hlŏh 2.350 ti.

Kơdră Kuô̆k hô̆i đei nơ̆r hơiă, chih răk păng pôk pơ ư tơdrong adrin păng dôm tơdrong jơnei đơ̆ng Đảng ƀô̆, Khul kơdră pơgơ̆r, khul linh păng kon pơlei dêh char Bình Thuận; atŭm hăm ‘nŏh athei, lơ̆m khei ‘năr oei đei dơ̆ng kơ jăl jang âu, Đảng ƀô̆ dêh char Bình Thuận athei hơlen năng dơ̆ng tơdrong bơ̆ jang kiơ̆ dôm trong jang, tơdrong tơchơ̆t đơ̆ng Hop akŏm Đảng lơ̆m tĕh đak ‘măng mă 13, dôm tơdrong tơchơ̆t đơ̆ng Trung ương, Kuô̆k hô̆i, Khul kơdră tĕh đak păng Tơdrong tơchơ̆t đơ̆ng Hop akŏm Đảng ƀô̆ dêh char ‘măng mă 14. Dêh char athei hơnơ̆ng bơ̆ jang ‘lơ̆ng tơdrong tơiung pơjing Đảng, pơjing anih jang chinh trĭ, hơmet kơjăp jơhngâm đon kăn ƀô̆, đảng viên. ‘Nâu jĭ tơdrong jang tôch gĭt kăl, athei bơ̆ jang mă rơđăh rơđong, ‘lơ̆ng hơiă ‘moi kiơ̆ tơdrong tơchơ̆t đơ̆ng tơpôl.