Kơdră Kuô̆k hô̆i Vương Đình Huệ kŭm hăm khul jang truh plang pơyơ̆r pơkao tơ̆ hơnăp Mul man Tổng Bí thư Nguyễn Văn Linh (plt Hưng Yên, dêh char Hưng Yên). Tổng Bí thư Nguyễn Văn Linh jĭ hŏk tro tôch rơgei đơ̆ng Ƀok Hô, jĭ bơngai đei kŏng tih hăm tơdrong jang kăch mang Việt Nam, jĭ Tổng Bí thư mă blŭng kơ Đảng bơ̆n lơ̆m chăl tơplih ‘nao.

Tơ̆ xăh Quảng Lãng (apŭng Ân Thi, dêh char Hưng Yên), Kơdră Kuô̆k hô̆i păng khul jang truh pơm Lêh tơlĕch jang pơjing Tơring jang kơmăy kơsô̆ 5 dêh char Hưng Yên. Tơring jang kơmăy kơ sô̆ 5 jĭ 1 tơdrong jang gĭt kăl kơ dêh char Hưng Yên, đei tĕh xă hlŏh 192 ha, hăm kơsô̆ jên kĭ pơkăp tơmât jang hlŏh 2.300 ti, đei găh dôm apŭng Ân Thi, Kim Động.

Ƀlep ƀât tơbăt 77 sơnăm năr Tơplŏng kơdâu Việt Nam 27/3, Kơdră Kuô̆k hô̆i Vương Đình Huệ păng khul jang truh hơpong tơ̆ Anih pơtho ăn hơiŏh đă ƀŏng lŏng (PVF). Tơ̆ âu, Kơdră Kuô̆k hô̆i Vương Đình Huệ kŭm hăm khul jang năm dăr lăng anih pơtâp pơhrăm, mơ̆ng nơ̆r tơroi găh tơdrong jang tơ̆ anih păng hơpăh tơmam pơlung ăn khul kăn ƀô̆, bơngai juăt jang, pơtho pơhrăm, dôm khul grŭp, đe kon mon oei kiơ̆ hŏk, đă ƀŏng lŏng tơ̆ PVF păng Khul đă ƀŏng lŏng Công an Hà Nội.