Kơdră Kuôk hô̆i Vương Đình Huệ păng Khŭl hlôi năm tơmang hơnih pơdă dôm tơmam, um rup tơklep hăm tơdrong arih păng tơdrong jang kach mang, roi tơƀôh dôm kơjă kăp gĭt đon tơchĕng đơ̆ng nhap ƀok Kơdră chĕp kơ̆l Fidel Castro păng tơdrong ‘mêm gĭt kăl đơ̆ng Kơdră chep kơ̆l Fidel Castro ‘măn ăn Việt Nam. Anih Fidel Castro đei ming man păng et hơtŏk ƀlep lơ̆m năr tơbăt 5 sơnăm năr hiong kơ nhap ƀok Kơdră chĕp kơ̆l Fidel Castro (25.11.2016 – 25.11.2021).

‘Nâu jĭ anih mă blŭng păng lăp hơdrô̆ đĕch đei hơnăn kơdră chĕp kơ̆l kach mang pran kơtang kơ kon pơlei Cuba. Teh đak Cuba hlôi tơlĕch 1 tơdrong tơchơ̆t gĭt kăl găh tơdrong pơ jing anih âu yua kơ ‘meh vă ƀơ̆t oei arih đơ̆ng nhap ƀok Fidel ‘noh đơ̆ng rŏng kơ lôch, ưh kơ đei trong kơ phô̆, cham ngôi pơ hiơ̆, hnam trưng hŏk, hnam pơgang dăh mă dôm hơyơ jang hơ yơ đei hơnăn Ƀok.