Kơdră Kuôk hô̆i Vương Đình Huệ tơbăt, Kuôk hô̆i Việt Nam păng kơ dih Kơdră Kuôk hô̆i lăng ‘lơ̆ng tơdrong pơvei tơbôl păng jang hơdai đơ̆ng 2 teh đak, jô̆ hloi lơ̆m tơdrong jang Khŭl kơdră teh đak păng nghị viện. Ƀar păh hlôi kĭ lơ hla ar drơ̆ng nơ̆r jang hơdai, mă loi ‘noh jĭ tơdrong pơ jing Tơdrong jang hơdai găh jên hu rơgoh; bơnê kơ Luxembourg hlôi păng tŏk bŏk ‘măn ăn kơ Việt Nam tơdrong tơgŭm - mă loi ‘noh jĭ lơ̆m tơdrong jang tơ jur dơnuh hin păng tang găn tơplih tŏ ‘mi kial, Luxembourg jĭ 1 lơ̆m dôm teh đak hrôih kĭ ăn tơdrong Tơchơ̆t vei lăng tơgŭm tơmơ̆t jên jang Việt Nam-Eu (EVIPA). Thủ tướng Luxembourg tơbăt, ‘năr 5-5, 2 păh pơgơ̆r hop akŏm mŭk drăm hăm tơdrong vang akŏm đơ̆ng 25 anih mơdro sa Luxembourg.

Tơƀôh tơdrong hơiă găh trong jang tơgŭm mŭk drăm đơ̆ng Việt Nam lơ̆m tơdrong apŭng plĕnh teh tŏk bŏk đei tơ jur, Thủ tướng Luxembourg akhan, Việt Nam ưh khan lăp lăng kăl hơtŏk tơiung mŭk drăm, mă oei lăng kăl tơ jur tơdrong tơlĕch hơ yuh ‘mê̆ ‘mach hnam kơ mĭl. Ƀlep ƀơ̆t năr âu, Thủ tướng Luxembourg ‘meh vă, Việt Nam jăh hŭt visa hăm kon pơlei Luxembourg vă pơm tơdrong hiôk ăn tơdrong pơtrŭt jang hơdai mŭk drăm, mơdro sa păng tơƀơ̆p băl đơ̆ng kon pơlei. Tơ̆ ‘măng pơma dơnuh, 2 kơdră chĕp kơ̆l kŭm drơ̆ng lăp găh tơdrong kăl kơ pơtrŭt pran kơ tang hloh dơ̆ng lơ̆m tơdrong jang jên hu rơgoh; ‘meh vă vang hơdai băl tơgŭm 1 mŭk drăm rơgoh, jên hu rơgoh.