Kơdră Kuô̆k hô̆i Vương Đình Huệ pơma hơdăh, Việt Nam hơpơi ‘mĕh 2 păh hơtŏk tơdrong tĕch mơdro kơjăp ‘lơ̆ng, hơtŏ băl, pơjing tơdrong hiôk hian vă răt iŏk lơ tơmam đơ̆ng Việt Nam tĕch tơ̆ Australia păng hơlơ̆k dơ̆ng. Kơdră Kuô̆k hô̆i athei Kơdră tang măt tôm tơdrong ăn Australia tơrĕk, hơtŏk tơdrong jang hơdoi găh tơdrong jang xa, mă loi ‘nŏh pơih xă tơdrong jang hơdoi găh ki thuơ̆t choh jang xa păng tơdrong jang lơ̆m pơyan pơdơh ngôi; hơtŏk tơdrong pơvei đơ̆ng dôm tơring kơ 2 tĕh đak.

Kơdră Kuô̆k hô̆i Vương Đình Huệ bơnê kơ Australia tơgŭm ăn Việt Nam lĕch pơjei mât jang lơ̆m Anih vei lăng tơdrong pơm tơm kơ kon bơngai Liên hợp quốc jăl jang 2023-2025, pơma nuh găh dôm tơdrong tơchĕng lei lăi băl tơ̆ rim khul jang tơ̆ tơring păng lơ̆m apŭng plenh tĕh. 

Kơdră tang măt tôm tơdrong David Hurley drơ̆ng nơ̆r roi tơbăt hăm Kơdră Kuô̆k hô̆i găh găh 1,2 tơdrong jang hơdoi ‘nao đơ̆ng anih chih pơjing khôi luơ̆t kơ 2 tĕh đak, akhan, ‘nâu jĭ tơdrong jang tôch gĭt kăl, hơnhăk ba tơdrong đei yoa ăn 2 păh, yoa thoi nŏh, athei tơrĕk truh dôm tơdrong jang ‘nâu, hŏk iŏk dôm tơdrong kăl đơ̆ng sơ̆ păng iŏk ‘nŏh pơm tơdrong gơn gơnang vă pơm hơtŏk tơdrong pơvei tơ̆ hơnăp ning mônh kơnh.