Pơma tơ̆ âu, Kơdră Kuô̆k hô̆i Vương Đình Huệ roi tơbăt tơdrong jang atŏk tơiung mŭk drăm, tơmât jên jang tơ̆ Việt Nam; atŭm hăm ‘nŏh tơroi, Kuô̆k hô̆i păng Khul kơdră tĕh đak Việt Nam oei hơnơ̆ng hơmet pơ ‘lơ̆ng trong pơgơ̆r, pơjing anih tơmât jên jang, tĕch mơdro hiôk hian hlŏh ăn dôm bơngai tơmât jên jang lơ̆m păng ‘ngoăih kơ tĕh đak, jô̆ hloi anih tĕch mơdro kơ tĕh đak păng anih jang kơdih, anih tĕch mơdro đơ̆ng tĕh đak đe.

Kơdră Kuô̆k hô̆i Vương Đình Huệ athei 2 păh hơnơ̆ng pơjing tơdrong ‘lơ̆ng ăn tơdrong tĕch mơdro tơmam ‘lơ̆ng ăn băl, mă hơdăh jĭ tĕch mơdro lơ păng kơjă sơđơ̆ng hăm dôm tơmam hơƀo, đŏu tương đơ̆ng Santa Fe păng 3 dêh char tơring Tŏk bŏk tĕh đak Argentina pơma adrô̆ păng đơ̆ng Argentina pơma atŭm. Việt Nam hơpơi ‘mĕh 3 dêh char set hơlen, răt iŏk dôm tơmam ‘lơ̆ng đơ̆ng Việt Nam nhen phe, cheh phe, cao su, tơmam tanh sĭt, găr điêu, kơmăy kơmŏk điên tư vă hơtŏk kơsô̆ jên đơ̆ng tĕch mơdro kơ 2 păh, năm truh tơdrong pơm hơtŏ băl găh tơdrong tĕch mơdro xa.