Lơ̆m jơ năr năm ngôi, bơ̆jang tơ̆ Liên bang Nga, tơ̆ Anih jang tang măt ăn Việt Nam, Anih tơm Moscow, Kơdră Quốc hội Trần Thanh Mẫn păng Khŭl tang măt gĭt kăl kơ Quốc hội Việt Nam hlôi tơƀơ̆p, pơma dơnuh hăm kang ƀô̆, bơngai jang kơ Anih jang tang măt păng bơngai tang măt tơpôl bơngai Việt Nam tơ̆ Liên bang Nga. Pơma dơnuh hăm tơpôl bơngai Việt Nam tơ̆ Liên bang Nga, Kơdră Quốc hội Trần Thanh Mẫn hlôi tơroi găh tơdrong chĭnh trĭ, mŭk drăm, tơpôl kơ teh đak.

Kơdră Quốc hội pôk pơ ư jơhngơ̆m đon tơgoăt tơgoăl đơ̆ng tơpôl bơngai Việt Nam tơ̆ Nga, hăm 60.000 ‘nu bơngai bơ̆jang lơ̆m lơ tơdrong jang nhen hŏk pơhrăm, bơ̆jang, pơm tơlĕch, tĕch mơdro păng hlôi pơjing đei grŭp tơgoăt tơgoăl. Kơdră Quốc hội pơma hơdăh, tơdrong jang tơgŭm kơjăp đơ̆ng Đảng păng teh đak bơ̆n ling lang bơngơ̆t truh păng lăng kăl tơpôl bơngai Việt Nam tơ̆ teh đak đe ‘noh jĭ hơkâu ưh kơ gơh tơpleh hơdrô̆, jĭ bơngai jang kơ tơpôl hơdrĕch hơdrŭng păng bơngai gĭt kăl tơgop hơtŏk loi dơ̆ng tơdrong pơvei jang hơdai, tơbôl đơ̆ng Việt Nam hăm dôm teh đak.