Pơma tơ̆ lêh roi tơbăt, pơjao tơdrong tơchơ̆t pôk hơpăh păng tơlĕch tơdrong pơjei băl lơm sơnăm 2025 drâm kơsơ̆ brei 13/2, Kơdră Quốc hội Trần Thanh Mẫn athei hơnơ̆ng tơplih ‘nao mă pran găh đon tơchĕng, bơ̆ jang, hơtŏk đon hlôh vao, tơplih ‘nao trong bơ̆ jang đơ̆ng Quốc hội pơm lăp hăm tơdrong hơmĕng, ‘mĕh vă đơ̆ng Đảng, đơ̆ng bơngai tăh hla păng kon pơlei.

Tang măt ăn Kơdră chĕp kơ̆l Đảng, Teh đak, Kơdră Quốc hội Trần Thanh Mẫn pơjao Mê đai bơ̆ jang dơ̆ng mă mônh ăn Phŏ kơdră adrol ki kơ Anih vei lăng dôm tơdrong lơ̆m tơpôl kơ Quốc hội, Phŏ kơdră adrol ki kơ Anih vei lăng tơdrong hơpơi ‘mĕh đơ̆ng kon pơlei găh Anih chĕp kơ̆l pơgơ̆r Quốc hội Lê Thị Nguyệt; pơjao Ƀăng khen đơ̆ng Anih chĕp kơ̆l pơgơ̆r ăn 15 khul grŭp.

Kơdră Quốc hội Trần Thanh Mẫn pơma hơdăh, ‘nâu jĭ sơnăm mă blŭng, Anih chĕp kơ̆l pơgơ̆r Quốc hội tơlĕch tơdrong pơjei băl, pôk hơpăh tơ̆ rim anih jang kơ Quốc hội kiơ̆ Luơ̆t pơjei, pôk hơpăh. Anih tơm Chinh trĭ hlôi tơlĕch tơdrong Tơchơ̆t kơsô̆ 41 găh hơtŏk tơdrong chĕp kơ̆l pơgơ̆r đơ̆ng Đảng hăm tơdrong pơjei pôk hơpăh lơ̆m chăl ‘nao. Kơdră Quốc hội athei hlôh vao kơjăp nơ̆r pơtho vă tơlĕch tơdrong pơjei băl mă ‘lơ̆ng, đei yoa, tơbăt 100 sơnăm pơjing Đảng păng 100 sơnăm pơjing Teh đak.