Hơnơ̆ng tơdrong jang ‘Măng hop akŏm mă 36, pơgê (21/8), tơ̆ Hnam Quốc hội, hăm tơdrong pơgơ̆r đơ̆ng Kơdră Quốc hội Trần Thanh Mẫn, Anih chĕp kơ̆l pơgơ̆r Quốc hội pơgơ̆r apĭnh jet păng tơl nơ̆r apĭnh jet tơdrong bơ̆jang kiơ̆ dôm tơdrong tơchơ̆t đơ̆ng Anih chĕp kơ̆l pơgơ̆r Quốc hội găh dăr hơlen tơdrong jang păng apĭnh jet đơ̆ng blŭng jăl jang Quốc hội jăl 15 truh đĭ sơnăm 2023. Pơma tơ̆ jơ apĭnh jet, Kơdră Quốc hội Trần Thanh Mẫn tơbăt: ‘Nâu ‘măng mă blŭng lơ̆m jăl jang Quốc hội jăl 15, Anih chĕp kơ̆l pơgơ̆r Quốc hội tơlĕch bơ̆jang dăr hơlen dơ̆ng, tơƀôh hơnăp jang đơ̆ng Anih chĕp kơ̆l pơgơ̆r Quốc hội lơ̆m dăr hơlen truh hăm tơdrong bơ̆jang kiơ̆ athei, apĭnh đơ̆ng Quốc hội, Anih chĕp kơ̆l pơgơ̆r Quốc hội.

Kiơ̆ đơ̆ng noh, hơlen lăng tôm tơdrong, pơm rơđăh dôm tơdrong mơmat tat, tơhlăk tơhlĭn lơ̆m kơplăh bơ̆jang, hơmet pơ ‘lơ̆ng tơtom, hơtŏk ‘lơ̆ng hloh dơ̆ng hơnăp jang đơ̆ng dôm anih jang pŭ tơdrong dăr hơlen. Kơdră Quốc hội lui ngeh dôm Bơngai tang măt Quốc hội hăm đon hơgei, jơhngơ̆m đon pơjing, tơlĕch trong jang hơiă ăn Khŭl kơdră teh đak, dôm Kơdră tơm, Kơdră anih jang lơ̆m pơgơ̆r, vei lăng, hơmet ming dôm tơdrong tam mă ‘lơ̆ng, hơmet pơ ‘lơ̆ng dôm tơdrong mơmat tat, tơhlăk tơhlĭn. Dôm bơngai jang lơ̆m Khŭl kơdră teh đak, dôm Kơdră anih jang hơnơ̆ng tơƀôh jơhngơ̆m đon jang hơnăp, hơdrin ‘lơ̆ng hloh, tơl nơ̆r tơpăt, ƀlep tơdrong, tơlĕch ăn hơnăp jang, trong bơ̆jang kiơ̆ jơnei dôm tơdrong hơgăt, hơnăp jang đơ̆ng Quốc hội, Khŭl kơdră teh đak tơlĕch ăn kơ sơnăm 2024 păng Tơdrong tơchơ̆t Hop akŏm ‘măng mă 13 kơ Đảng.