Đei lơ bơngai tăh hla bơngơ̆t truh dôm tơdrong jang ƀơm truh tơdrong tơgŭm công đoàn; kla jên păng iŏk yua ƀao hiêm pơgang, ƀao hiêm tơpôl. Hăm dôm nơ̆r apĭnh gơh tơ̆l đơ̆ng tơring, kơdră chĕp kơ̆l dôm anih jang, Anih vei lăng kon pơlei dêh char Hậu Giang hlôi tơl nơ̆r kơtă ăn dôm bơngai tăh hla. Kơdră Quốc hội Trần Thanh Mẫm athei, hăm dôm tơdrong mơmat tat đơ̆ng kon pơlei, kơdră chĕp kơ̆l dêh char athei hlôh vao nơ̆r pơma đơ̆ng Ƀok Hồ akhan, “Tơdrong kiơ đei yua ăn kon pơlei ‘noh jang, tơdrong kiơ đei pơrăm ăn kon pơlei ‘noh athei ver”.

Mă loi ‘noh, dôm tơdrong ưh kơ lăp đon đơ̆ng kon pơlei athei đei hơmet pơ ‘lơ̆ng mă lăp, mă trŏ. Kơdră Quốc hội tơtă, đơ̆ng rŏng ‘măng tơƀơ̆p pơma dơnuh hăm bơngai tăh hla âu, Khŭl tang măt Quốc hội dêh char Hậu Giang, Anih jang Mặt trận Tổ quốc chih akŏm dôm nơ̆r tơgop vă roi tơbăt ăn Anih jang Quốc hội, gơih dôm nơ̆r tơgop, apĭnh gơh tơl đơ̆ng Khŭl kơdră teh đak, dôm anih tơm anih jang vă hơmet pơ ‘lơ̆ng.