‘Măng năm bơ̆ jang mă âu đơ̆ng Kơdră tĕh đak bơ̆n ‘nŏh jĭ tơdrong jang tơbôl gĭt kăl, tơƀôh hơdăh anih dơ̆ng păng hơnăp jang đơ̆ng tĕh đak bơ̆n tơ̆ tơring păng lơ̆m apŭng plenh tĕh. Tơdrong Kơdră tĕh đak bơ̆n vang truh pơm lêh Tŏk pơm Ƀok Pơtao đơ̆ng Ƀok Pơtao tĕh đak Charles III tơƀôh hơdăh tơdrong năng kăl đơ̆ng Việt Nam hăm Ƀok pơtao tĕh đak Anh păng tơdrong pơvei ‘lơ̆ng hơiă gĭt kăl Việt Nam - Anh.

Kiơ̆ bơngai tang măt ăn Việt Nam tơ̆ tĕh đak Anh Nguyễn Hoàng Long, ‘nâu jĭ ‘măng năm hơpong tơ̆ tĕh đak Anh ‘măng mă 2 đơ̆ng Kơdră tĕh đak bơ̆n đơ̆ng rŏng vă jê̆ 20 sơnăm âu ki, ƀât mă tơdrong pơvei kơ 2 tĕh đak Việt Nam păng Anh oei mât lơ̆m khei ‘năr tŏk ‘lơ̆ng hlŏh đơ̆ng sơ̆ truh dang ei. Mă loi, lơ̆m sơnăm 2023, 2 tĕh đak oei vă tơbăt 50 sơnăm pơjing tơdrong pơvei jang tơbôl hăm lơ tơdrong gĭt kăl, ‘lơ̆ng hơ iă tơ̆ lơ tơring lơ̆m tĕh đak Việt Nam păng tĕh đak Anh.