Ƀar ƀok kơdră tơƀôh hơdah tơdrong chơt hơ-iă hăm dôm tơdrong hơtŏk 'lơ̆ng lơ̆m jang tơbôl kơ 2 teh đak, drơ̆ng nơ̆r pơtoi kơhret hloh dơ̆ng Jang tơbôl tôm tơdrong, pơkăp pơjing Jơnŭm jang kăp gĭt khei năr hơnô̆ hơnăp kơnh Việt Nam – Trung Quốc. Kơdră teh đak bơ̆n Lương Cường pơtruh nơ̆r hơtŏk hloh asong khul kơpal năm hơpeh hơpong dih băl, hơtŏk jang hơdoi gah dôm tơdrong: khua hŏk – kơmăi kơmŏk 'nao; tơplih 'nao gơh hơgei, pơtho bơngai jang hơgei, pơtoi tơdrong jang hơdai mŭk drăm- tĕch pơdro, pơtho pơhrăm păng tơmang pơhiơ̆.

Ƀok Tập Cận Bình ră hơdah, kăl hrôih pơgơ̆r 'Măng hop akŏm mă mônh kơ Anih jang hơdoi gah trong gre treng, atŭm hăm noh hơtŏk pơma đam đe kơdră kơpal, vă pơđăp gah tơdrong hlôh vao lơ̆m hơtŏk pơ-'lơ̆ng Đảng, vei lăng teh đak. Ƀar pah adoi drơ̆ng nơ̆r tơlĕch dôm tơdrong jang lơ̆m Sơnăm hơpeh hơpong lơ̆ng hơ-iă tơbăt 75 sơnăm iung jang tơbôl.