Ƀô̆ trương Jang tơbôl kơ teh đak Lào pơtruh nơ̆r bơnê hăm Đảng, Teh đak păng kon pơlei Việt Nam hơnơ̆ng tơgŭm, tơguăt hơtŭm hăm Đảng, Teh đak păng kon pơlei teh đak Lào. Ƀok Kơdră teh đak bơ̆n Lương Cường lui ngeh, hăm tơdrong hlôh vao lơ̆m pơm jang, atŭm hăm đon bơnôh 'lơ̆ng hơƀăp đơ̆ng Ƀô̆ trương hăm Việt Nam, hăm kơchư̆k jang kơ po, Ƀô̆ trương Jang tơbôl Lào gô đei lơ tơgop kăp gĭt ăn tơdrong jang tơbôl kơ 2 teh đak.

Kơdră teh đak bơ̆n bơnê kơ tơdrong jang đei jơnei kơ 2 Anih tơm jang tơbôl lơ̆m khei năr ki, tơgop kăp gĭt lơ̆m tơdrong hơtŏk tơbôl jang hadoi 2 pah; bơnê kơ Ƀô̆ trương Jang tơbôl teh đak Lào hlôi tơgŭm, pơm trong hiôk ăn kon pơlei Việt Nam tơ̆ Lào pơm jang, hơrih xa sơđơ̆ng tơ̆ teh đak Lào, tơgop kăp gĭt ăn tơdrong tơ-iung pơjing teh đak Lào roi năr roi jơnap păng pơm gơng tơroh hơtŏk tơdrong tơbôl Việt Nam - Lào. Ƀar ƀok kơdră chơt hơ-iă hăm dôm tơdrong jang đei jơnei kăp gĭt lơ̆m tơdrong jang tơbôl 2 pah khei năr âu ki, mă kăl lui ngeh gah chĭn trĭ păng pơtoi hơtŏk jang hadoi vei sơđơ̆ng tơpôl, pơtoi jĭ trong tơm kăp gĭt lơ̆m tơdrong jang tơbôl 2 pah.