Đơ̆ng rŏng lêh xơng, Kơdră teh đak bơ̆n Võ Văn Thưởng păng Kơdră kơpal teh đak Australia pơgơ̆r pơma đam, bơnê kơ dôm tơdrong jang đei jơnei păng tơlĕch trong jang hơtŏk tơbôl jang hadoi kơ 2 teh đak lơ̆m khei năr truh. Việt Nam păng Australia iung jang tơbôl đơ̆ng xơnăm 1973, hơtŏk Jang hadoi tôm tơdrong ăh xơnăm 2009, jang Hadoi tôm tơdrong keh kong ăh xơnăm 2015 păng hơtŏk Pơkăp trong jang hadoi ăh khei 3/2018. Australia jing minh lơ̆m dôm teh đak jang hadoi 2 păh axong ODA ưh đei iŏk tơvih tih hloh ăn Việt Nam. 50 xơnăm kơ âu, Australia hlôi tơgŭm ODA Việt Nam hơkŏp đei 3 tih đôlar Ŭk, hơtŏk hăm 47 rơbâu tih hlj Việt Nam. Dang ei đei pơhlom 31.000 'nu sinh viên păng bơngai hŏk hơlen Việt Nam tŏk bŏk oei hŏk pơhrăm tơ̆ Australia (90% kiơ̆ pơkăp kơdih axong jên).