Kơdră teh đak bơ̆n Lương Cường păng hơkăn ƀok atŭm hăm khul kơpal teh đak Việt Nam pơtôch 'lơ̆ng rŏ 'măng năm akŏm dôm tơdrong jang kơpal tơ̆ Hơnih jang Liên hơp kuôk jăl 80, tơguăt hăm jang hơdoi 2 pah tơ̆ teh đak Mi, đơ̆ng năr 21 truh năr 24/9. Lơ̆m 'măng năm pơm jang, Kơdră teh đak bơ̆n hlôi đei ƀai đŏk kăp gĭt tơ̆ 'Măng pơma đam atŭm kơpal kơ Hơnih jang Liên hơp kuôk jăl 80 păng Hop akŏm kơpal jơ̆p kơpal teh gah Pơm jang tŏ 'mi kial.  Atŭm hăm noh, Kơdră teh đak bơ̆n hlôi đei lơ tơdrong tơƀơ̆p, pơma đam 2 pah hăm kơdră kơ dôm jơnŭm jang apŭng plenh teh păng kơdră kơ dôm teh đak.

Kơdră teh đak bơ̆n sơkơ̆t hơdah Việt Nam hơnơ̆ng hơdrin dơh po păng yak hơdoi hăm tôm teh đak vă vang glơng sơnong jang atŭm, găn hloh tơnap tap, hơtŏk tơplih kơtang vă pơjing minh apŭng plenh teh rơngei, sơđơ̆ng, hơtŏk tơ-iung jơnap păng kơjăp đunh khei năr, hơ-'nhăk tơdrong phĭ tơtŏ dơnŏ 'lơ̆ng ăn kon pơlei. 'Măng pơm jang đơ̆ng Kơdră teh đak bơ̆n hlôi đei jơnei 'lơ̆ng rŏ lơ̆m lơ tơdrong jang hơdoi hăm lơ teh đak, răk 'măn tơdrong 'lơ̆ng hơ-iă gah sơnong jang, anih dơ̆ng, tơgop kăp gĭt, tơpă đơ̆ng Việt Nam lơ̆m sek tơlang dôm tơdrong đei ƀôh lơ̆m kơpal teh adoi nhen hơtŏk jang tơbôl Việt Nam hăm Mi, tơbôl Việt Nam hăm rim teh đak vă tơgop ăn tơdrong rơngei sơđơ̆ng, hơtŏk tơ-iung lơ̆m tơring păng lơ̆m apŭng plenh teh.