Lơ̆m ƀai đŏk tơbang, ƀar ƀok kơdră adoi xơkơ̆t, hăm dôm tơdrong đei jơnei tơgăl kơ pôk bơnê lơ̆m tơdrong jang hadoi kơ 2 teh đak lơ̆m tong anê̆ anglŏ xơnăm kơ âu, mă kăl noh đơ̆ng tơdrong đei jơnei kơ 'măng năm tơmang âu, tơbôl kơ 2 teh đak gô hơtŏk hloh, 50 xơnăm pơtoi kơ tơdrong tơbôl 2 teh đak gô ang hơdăh hloh. Ƀok Kơdră teh đak bơ̆n Võ Văn Thưởng vih tơbăt dôm tơdrong kăp gĭt lơ̆m tơbôl jang hadoi Việt Nam-Australia, xơkơ̆t tam mă lai yơ tơdrong tơbôl 2 teh đak kơjăp păng hơtŏk 'lơ̆ng rŏ nhen dang ei, atŭm hăm noh hmach bơnê kơ teh đak Australia hơnơ̆ng tơrĕk tơgŭm jên ODA ăn Việt Nam, tơgop kăp gĭt ăn tơdrong hơtŏk mŭk drăm – tơpôl, hơtŏk tơdrong erih ăn kon pơlei Việt Nam. Ƀok Kơdră Kơpal teh đak Australia xơkơ̆t, Australia chơt hơ-iă kơyuơ đei boăl, teh đak lui ngeh păng tơpăt jue nhen Việt Nam. Ƀar teh đak tŏk bŏk atŭm băl pơm jang hơdăh tơchơ̆t atŭm lơ̆m tơring  Ấn Độ Dương -Thái Bình Dương, jing tơring xơđơ̆ng, jơnap, tơring mă tơdrong pơgơ̆r kơdih păng dôm khôi luơ̆t apŭng plenh teh đei tơgĭt.